MNF-in Pathian hnenah lawmthu an sawi

MNF chuan Dampa Bial MLA by-election neih zawh taka hnehna an chan avangin vawiin (17.11.2025) hian Vanapa Hall-ah Pathian hnena lawmthu sawi inkhawm an buatsaih a, MNF President Zoramthanga leh by-election a thlan tlin tak, MNF Sr. Vice President Dr R Lalthanglianate’n thu an sawi.

MNF President chuan MNF chu an duhtawk ni loin, Pathianin a duhtawk pek thin thu sawiin, “Chuvangin, Pathian hnenah lawmthu kan sawi a ni. DampaBial by-election a party zawng zawng campaign-a chhuakte accident laka veng tura kan tawngtaina chu Pathianin min chhang a, a lawmawm takzet a ni,” a ti.

Dampa Biala ZPM Candidate chak lohna chu ZPM Party chak lohna leh Chief Minister chak lohna a nih thu sawiin, “Bana Kaih Policy hnawlna a ni. Hei hi Pu Rama sawi nilovin, Pu Duha sawi a ni. Article 371 (G) hrechiang ber anga inchhal hian, a pawilai ber kan ram himna leh neihtu kan nihna hralh a, hriat ringawt a lo tawk lo,” tiin a thlaraua chian a ngaih thu a sawi.

Dr. R Lalthangliana pawhin thu sawiin, “He hnehna hi Dr. Thangtea hnehna a ni loa, Pu Zoramthanga kaihhruai MNF hnehna a ni a, chu hnehna chu Pathian vang a ni. MNF hruaitu, party mite leh bial mipuite thawhrimna piahlamah, Pathian vang liau liauva hetiang dinhmuna ding thei hi kan ni. Pathianin chawimawina sangbber chang rawh se,” a ti.

Zoramthanga kaihhruaina hnuaiah MNF hian Zoram hmasawnna ruhrel lian leh pawimawh zawng zawngte hi a lo thawk tawh thin thu sawiin MNF Sr. Vice President chuan, “Hun khirh leh thim tak tak kan lo paltlang tawh a, Pu Zoramthanga hi Pathian mi a nih vang a ni,” tiin MNF dintuten, Pathian leh kan ram tan, tia thupui an lo vuah chu tun thlengin Lalpan mal a la sawm thu a sawi.