News

Hmarchhak biala hriselna dinhmun tih hmasawn zel nan Medanta Hosptail chuan tun hnai khan Mizoram Sawrkar nen Mizoram Universal Health Care Scheme (MUHCS) ah thawhdunna tur thuthlung an ziak. Hei hian damlote chu pawisa chawi ngai loa an damdawi in kaltlanga an in enkawl theihna tur a chhawpchhuah sak. Medanta Hospital hi ramchhung hmun hrang hrang Gurugram, Noida, Lucknow, Patna, Indore leh Ranchi ah te a awm a ni.

Medanta damdawi ina Chairman leh Managing Director Dr. Naresh Trehan chuan hmarchhak biala hma thar an lak na chu lawmawm a tih thu sawiin, “Hei hian mipuite tan thil tha zawk a thlen ngei ka beisei. Medanta-ah chuan damlote uluk taka enkawl an nih thin bakah an hamthatna tur hrang hrang ngaihtuah sak thin a ni. Mizoram Sawrkar nena kan thawhdunna hian rah tha a chhuah ngei ka beisei. Mizo damlo kan damdawi ina enkawl tur an awm chuan theihtawp kan chhuah dawn,” tiin mitin ban phak nih an tum thu a sawi.

Mizoram State Health Care Society CEO Dr. Lalhriatzuali Ralte chuan Medanta nena an thawkdun tur chu Mizote tan chanchin lawmawm tak a nih thu sawiin, “Hemi hmang hian Mizoram atanga damlo phai lam kal duh tan harsatna tam tak a chhawk zangkhai ngei kan beisei. In enkawl kawngah pawh damlote tan kawng awlsam zawk a siam sak ngei kan beisei a ni,” a ti.

Hmarchhak biala hriselna dinhmun tih hmasawn kawngah Medanta hian nasa taka hma la in Guwahati, Assam-a an damdawi in chu khum 400 chuang awm theihna super speciality hospital ni turin an chei thar mek. Heng bakah hian Medanta chuan hmarchhak bial tan bik tanpuina koh theihna tur number : 8904395588 a chhawpchhuak bawk a ni.