News

Vawiin (15.11.2025) chhun khan Luangmual MNF Unit huaihawtin Martar Thlanmual, Lungmualah Zo Kut (hnam martarte sunna leh rammute chawimawina) hun hman niin MNF Treasurer Lalruatkima chuan a hmanpui a, Zoram tana zalenna sualtute hnenah chawimawina thuchei leh thangchhuah diar a hlan nghal a ni.

Lalruatkima, Revenue Minister hlui chuan tunhnaia zalenna suala rammute puala ram pek LSC semchhuah chungchang sawiin, “Kum 1986-a remna ziah a nih khan remna avanga lo chhuakte tan Maumualah ram mi 653 hnenah pek an ni. Khatih lai khan tlemin a la ramhnuai deuh a, chei a ni mai lo. Kum 2022 April thla khan MNF Sorkar chuan cheiṭhat a, chinfel ṭha a ti a, DM&R aṭangin pawisa nuai 50 sanction a ni. Committee-te din niin Ex MNA leh PAMRA aiawh telin, housing complex fel tak, in zawng zawngin kawng an vek turin ruahmanna siam a ni. Hna thawh char char a ni a, kawng pawh laih fel vek hman a ni. Teh ṭhat leh niin in hmun 720 zet a chhuak ta. Pass siamthat hna hi MNF Sorkar khan a peih hman ta lo a ni. A field work zawng zawng kan sorkar khan kan peih fel vek a, table work tlem he sorkar hian a thawk ve chauh zawk a ni. ZPM Sorkar tih vek angah mi tam takin a ngai hi a dik lo,” a ti.

MNF Treasurer chuan Zofate hi Mizoram State chhungah chauh kan chen loh thu sawiin, “Burma, Bangladesh, Tripura, Assam leh Manipurahte kan cheng. Zofa hmun hrang hranga awmte hi unau vek kan ni a, indawm tawn a, inhmangaih tawn tur kan ni. Hnam pasalṭha tam takin Mizo hnam tan nunna an hlan. An nunna hlu tak kha hlan lo se, kan ram awm dan tur hi chhut thiam a har hle a ni. Mahni puala ram nei lo hnam tan tak an awm laiin, keini chuan ram mawi leh ṭha tak Pathianin min pek hi kan zah a, kan enkawl thiam a pawimawh hle,’ tiin kan hnam leh ram, kan piputen an lo humhalh a, an lo sah zau hi kan humhim tlat zel tur a nih thu a sawi.