Saiphai Police-te chuan ni 10.3.2026 (Thawhlehni) tlai dar 5:40 khan Saiphai khaw daiah Kolasib leh Saiphai inkara maxi cab service atangin heroin hawng 38 an man.

Thu dawn danin, Saiphai Police hian Lamka, Manipur atangin ruihhlo tawlh ruk a awm tih thu an dawn bawhzuiin Kolasib leh Saiphai inkara maxi cab chhunga bag dumpawl atangin Heroin hawng 38 (grams 462.08) an man.

Maxi cab khalhtu Lalpianmawia (46), Saiphai chuan bag hi a neitu a sawi theih loh avangin thu zawhfiah atan police-in an la. Driver bakah hian Lamka atanga lo haw Lallunghnema (35) leh Lalhruaimawia (28) Saiphai khua ve ve ni-a insawi chu thuzawhfiah atan an la tel.

Saiphai Police-in Heroin an man hi cheng nuai 92.41 man hua chhut a ni. Vairengte Police Station-ah ND&PS Act hmanga thubuai ziah luh a ni.