Mar 30, 2026
Monday
MPCC chuan vawiin (30.3.2026) hian an office-ah chhung inkhawm an hmang a, thusawitu MPCC Sr. Vice President Lalnunmawia Chuaungo chuan sorkarna an chan chuan health care changtlung zawk kalpui an tum thu sawiin, MNF leh ZPM chu education politics-a hlawkpui tumah a puh.
Lalnunmawia Chuaungo chuan Congress-in sawrkarna an chang leh a nih chuan sawrkar kalphung an thlak danglam dawn tih sawiin, “Keimahni hamthatnan thuneihna kan hmang ve dawn lo. Kan President hi mi dik a ni a, chutiang hamthatna um mi chu niin ka hre lo a ni.” a ti.
Congress chuan health care siamthat te hi an ngaihpawimawh tur zing a mi a nih thu sawiin MPCC Sr. VP chuan, “Changtlung zawkin kan kalpui dawn a ni. Health care hi ram hausa leh ram changkangte pawhin an buapui a ni a, a hautak em em a ni. Natna a nasat hma a inenkawlna, primary health hi tun thleng hian kan ngaihthah em em a, hei hi kan ngaipawimawh a ngai a ni. Natna a nasat hma a natna hmuhchhuah leh enkawlna hi Congres kan sawrkar chuan kan ngaipawimawh dawn a, natna hmuhchhuah zung zung a nih theih nan Primary Health Center te kan ti changtlung ang,” tiin laboratory changtlung tak an din sak zel dawn thu a sawi.
Lalnunmawia Chuaungo chuan education reform hi kan kalpui dawn tih sawiin, “Primary education kan ngaipawimawh dawn. Higher education kan ngaihthah dawn tihna a ni lova, a bul primary education-ah tan kan la nasa dawn tihna a ni. Kan tu leh fate zirna bul hi kan ngaihthah thiang lova, a ler atanga thuai chi a ni lo. MNF sawrkar kalta khan politic a hlawkpui nan education hi an hmang a, tuna ZPM pawh hian chutiang tho chuan hlawkpui tumin hmanruaah an hmang a, keini chuan kan ti ve dawn lo,” a ti.
