Goa CM leh Goa Tourism Minister kawm

Nimin (19.11.2024) khan Tourism Minister Lalnghinglova Hmar chuan nimin khan Goa Chief Minister Pramod Sawant leh Tourism Minister Rohan Khaunte-te chu Goa-ah a kawm a, tourism lam hmasawnna tura state pahnih thawh dun chungchang a sawipui a, Goa-a Mizo leh Northeast mi chengte hamṭhatna turte a thlen nghal.

Lalnghinglova chuan Mizoram chu khualzinte tana pan chakawm leh leh mawi, tourism lama hmasawn mek a nih thu Goa Chief Ministerhi hrilh a, “A ram leilung mawina bakah tlang leh ruamte chu adventure tourism leh sports tourism tan pawh remchang leh theihna zau tak nei a ni. Goa hi India rama tourism lama a hmahruaitu a nih angin state pahnihte thawhdunnain hmasawnna a thlen ka beisei. Goa aṭangin thil tam tak zir theih a ni,” a ti.

Goa Mizo Welfare survey atangin Goa-ah Mizo 1,500 dawn an awm tih sawiin Tourism Minister chuan, “Goa hi Mizoram mai bakah Northeast state dang thalai sing chuang tana eizawnna siamsaktu a ni,” tiin Goa-a hnathawkte himna tur leh mamawh huna an koh theih tur Goa sorkarin siam se tih rawtna a thlen.

Goa Chief Minister chuan Mizoram Tourism Minister chu tha taka lo dawngsawngin, tourism lama thawhhona chu a taka kalpui theih a nih tur thu a sawi a; Mizo leh hmarchhak aṭanga hnathawkten harsatna an tawha an biak pawh tur Chief Minister Office-ah ruat nghalin, Mizoram Tourism Minister nen a inhmelhriattir. Goa Mizo Welfare htuaitute nena inhmelhriattir zui turin Lalnghinglova Hmar hi a chah nghal.

Mizoram Tourism Minister leh Goa Tourism Minister Rohan Khaunte te pawh nimin vek khan inkawmin, state pahnih tourism hmasawnna’na thawh dun theihna hrang hrang an sawi dun.

Goa-in tourism atana digital platform hrang hranga a neihah Mizorama tourism hmunhma leh event tarlan ve te, tourism leh hospitality lama exchange programme neih te, tourism kaihhnawih skill development lama thawhdunte bakah state pahnih tourism tihlar kawnga thawh dun chungchanga Mizoram Tourism Minister rawtna thlente an sawi dun a ni.

Rohan Khaunte chuan Lalnghinglova Hmar hi lawm taka lo dawngsawngin, thawhdun theihna an neihte chu zirchianga tihhlawhtlin ngei an tum tur thu a lo hrilh. Hmalak chhunzawm dan turah state pahniha Tourism Department hotute lo indawr chhunzawm nise tiin an sawi dun a ni.