News

GIG Motors chuan ni khat chhunga lirthei an hralh tam ber hun an hman hnuah rel lo lut chhawrin December chhungin car 500 hralh chhuak theih an inbeisei.

Mizorama Maruti-Suzuki dealer chuan inrinni khan an hnuaia showroom pahnih Arena, Edenthar leh Nexa, Thuampui atangin car 48 an hralh tih an sawi a; August 23, 2017 khan GIG Motors hawngin heta tang hian ni khat chhunga an hralh tam ber a ni.

Chief Executive Officer John Lalpeka chuan, kumin chhova kawng chhia avangin lirthei lak luh kawngah harsatna an tawk nasa a; mahse, tun thla atangin Sairanga rel rawn lut an chhawr thei dawn a, chuvangin December chhunga 500 hralh thei turin hun tha an nei a, puitlin theih ngei an inbeisei tih a sawi.

Sairanga rel lut hian a tam berah wagon 25 a hnuk thei a, heng wagon zawng zawngah hian Maruti-Suzuki car 100 atanga 25 vel a phur thei dawn a ni. Rel bakah hian an kalpui dan pangngaiin truck-in a phur lut tel reng dawn bawk a, lirthei lak luh kawnga harsatna an neih thin an su kiang thei dawn.

Kawngpui a ziaawm deuh hnu September atanga November thleng thla thum chhungin GIG Motors-in sorkarin lirthei hralh zat a chhinchhiahna Vahan-ah 818 an ziak lut a, kumin chhovah October kha an hralh tam ber niin Vahan-ah 285 an ziak lut a ni.

Maruti-Suzuki dealer an nih atangin kum riat leh thla lina an hmang mek a, January 2024 kha thla khat chhunga Vahan-a an ziah luh tam ber niin 346 an tlin. Hetih lai hian Vahan-a an ziak luh leh thla khat chhunga an hralh zat dik tak hi inmil tawk lo a awm thei a, khawl lam fel lo avanga ziah luh hun tihkhawtlai leh thla tawp lama an hralh chhuah thla thara ziah luh ngai a awm thin bawk.