GAD-in AR Biak In chungchangah thuchhuah siam

General Administration Department (GAD) chuan Assam Rifle Biak In hmun chungchangah mipui hriattur a hnuaia tarlan ang hian thuchhuah a siam. AR Biak In hmun Synod kutah a awm chhunzawm dawn.

GAD chuan Assam Rifle ram chhuahsan chhunga AR Biak In hmun chungchangah mipui hriattur press note a lo chhuah tawh a ni. He thu chhuahah hian AR Biak In hmun chu Central YMA ten High Court-a PIL WP(C) No 31 of 2020 thehluh zingah a tel ve angin tarlan a ni a, hemi chungchanga thil awm dan chu hetiang hi a ni:

AR Biak In hmun hi Central YMA-ten thubuai an thehluh zingah hian a tel anga hriat a nih avangin, Assam Rifles ram chhuahsan hman dan tur reltu tur a The Mizoram (Restriction on Use of Transferred Land) Act, 2002 hnuaia Committee din Advisory Committee thutkhawm ni 24.07.2025 a neihah chuan court thu ngaihchan rih phawt ni se tiin a rel. Hemi chungchang hi Mizoram Synod hruaitute pawh hriattir nghal ni se a tih angin hriattir nghal an ni.

Court thu ngaihchan a nih mek lai hian Central YMA chuan Mizoram Synod hnenah an thubuai thehluh zingah AR Biak In hmun chu a tel lo tih a hriattir a ni.

Hriattirna a dawn ang hian Mizoram Synod chuan sawrkarah AR Biak In hmun chu thubuai thehluh zingah a tel ve loh thu hi an hriattir ve nghal.

He lehkha thehluh hi Advisory Committee thutkhawm ni 18.11.2025 a neih chuan ngun takin a ngaihtuah a, tun dinhmunah chuan AR Biak In hmån hi Assam Rifle-ten sawrkara an hlan zingah chuan a tel ngei a, mahse CYMA lamin thubuai a thehluh zingah a tel ve loh avangin Mizoram Synod kutah hian awm chhunzawm mai se tiin a rel a ni.

Advisory Committee hi party hrang hrang aiawh leh NGO sawm chuang awmna, mipui aizawh zo tura din a ni a, He Committee hian lungrual takin thuthlukna a siam thin. Committee rorelnaa tel member tupawh pawn lama Committee rorelte sawisel a, politics khelh nana hmang tawh lo turin kan inhriattirin kan inngen a ni