News

Kolasib Diakkawn khawtlang chuan vawiin (20.10.2025) chawhma dar 10 atangin chhan hrang vangin an veng chhung kawngpui an phiat fai dawn a, contractor-te ti thlabar zawnga che lo turin veng mipuite an in ngen.

Kolasib Village Council leh All NGO chuan kawngpui an phiahfai tur chungchangah hian a hnuaia tarlan ang hian thuchhuah an siam.

1. Mizoram Cleanliness Competition neih tura inbuatsaihna atan Urban Development & Poverty Alleviation Department chuan khawpui fai kan nih theih nan Kolasib khawchhung VC tinte veng fai inelna an kalpui mek a, Diakkawn khawtlang pawh kan lo fai zual theihnan hmalakna hrang hrang neih a ni. Hemi lai hian kan veng paltlangtu national highway chu a chhiain vaivut a tam em em a, faina lama hma kan lak mekah heng vaivut lo then hi a ṭul in kan hria a ni.
2. Vaivut khu hian hriselna a tichhe thei a, hei vang hian thla hlui lawkah pawh VC te ruahmanna hnuaiah hnatlangpui neiin khawlai khu leh bawlhhlawh phiatfai hian mipui kan lo hnatlang tawh a ni. Chubakah Diakkawn hi tunhma aṭangin market hmun a ni a, mipui lenluh tamna kan nih avangin veng dang aiin bawlhhlawh kan dawng tam hma bik bawk a ni.
3. NHIDCL chuan national highway kawngpui siamtu turin Jandu Construction Company a ruai a, working season a nih veleh kawngpuiah bitumen phah an tum thu te, kumthar March thlaa an hnathawh tur chin zawhfel vek an tum thute an sawi. Kumin bikah Mizoram District hrang hrang zingah Kolasib District chu ruahtui dawng tam ber a ni a, contractor-ten thla thar aṭanga kawng chhuat phah hna thawh an tum thu an sawi pawh dawhthei takin kan nghak hram hram a ni. Kan thahnem ngaihluatah kawng siam tur contractor-te a thlabar zawng leh awm ti nuam lo ang chi phei chuan khawtlang mipuite pawh chet thawh lo tur te pawhin kan in ngen tawh a ni.
4. Heng thil ngaihtuah chung hian VC te leh Diakkawn All NGO Meeting chuan hnatlangin kan veng chhung National Highway phiahfai leh nise kan ti a, hei hi politics zawng a inbeihna leh midang tihmualpho tumna a ni lo tih mipui ten min hriatsak turin kan ngen e.