Khawvel hi a danglam reng &#8211; CM

ZPM president atana ruat thar Chief Minister Lalduhoma chuan vawiin (21.9.2026) hian an party pisaah thu sawiin, “Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni,” a ti.

Lalduhoma chuan Pathian kaihhruaina a zarah ZPM-in kum 10 an lo tlin ve tak thu sawiin, “Vawiin min thlenpuitu leh sorkarna hial min thlenpuitu chu kan hruaitu kalta te an ni. ZPM a awm chhung chuan kan hre reng tawh ang. Hruaitu thar ruat chungchangah Pathian kan rawn nasa a, mi tam takin min tawngtaipui a, vawiina hruaitu thar ruatte hi VUC kaltlanga kan tawngtai chhannaah kan ngai a ni. ZPM hi Mizorama party awm zingah Val Upa Council nei awm chhun kan ni a, kawng hrang hrangah an telna tur awm lo mahse a pawimawh hunah an rawn lang thin a, tun dinhmunah pawh an pawimawh leh tangkaizia kan hria a, kan chhawr tangkai hle a ni. Chu mai ni loin CM ruattu an ni a, inthlan hma fe atang tawhin CM tur an ruat lawk vek a, inthlan fel tawh hnuah CM tur ruat ni chauh se House Leader tur inchuhna leh thil dangah harsatna thleng thei a ni,” tiin hetiang buaina awm thei hi ZPM chuan kan neih ve loh thu a sawi.

Khawvel hi a danglam reng a, danglam ve ngai lo chu danglamna a nih thu sawiin Lalduhoma chuan, “Pathian meuh pawhin thuthlung a thlak fo thin. Thuthlung hlui hun a awm a, thuthlung thar huna awm leh bawk a, Lal Isua ngei pawhin ngaihdan a thlak fo. Tun hma chuan sakap thei an ngai sangin an ngaihlu thin a, tunah erawh dan bawhchhiatna a ni tawh. Tun hma chuan birth control (family planning) an thupui a, tunah erawh pian pun kan thupui leh mek tawh. Socialism buaipui hunlai te, Independent sual duh hunlai te pawh a awm. Mahse, a hnuah chuan India nena inremna daltu nia an ngaihte chu an hmelmate an ni leh bawk. Heng thilte hi demna tur a awm lova, a hun lai mil ang zela ngaihdan leh ngaihtuahna sen a ngai thin a ni. Hun inher mil zelin ZPM pawh kan inthlak danglam chhova, CM leh party president chelh kawp tha kan ti lova, hun eng emaw chen kan kalpui hman. Tunah erawh kan thatna tur zawk nia hriain party thuneitu sang kal khawm chuan CM leh party president nihna chelh kawp chu tha zawk dawnin a hre leh ta a ni. Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni. Pawl leh party hrang hrangah committee thu ti put ru duh an awm foa, meeting thurel, a tam zawk duh dan pawm harsa ti thin an awm. Pu chuam neih te, hotute tlawna tlaktlum tum thin te, intihtheih ching te, ram leh party ni lo mahni tana chakai khawrh thin te, heng zawng zawng hi ZPM party-ah chuan dinhmun sang chelh tur atan kan duh lo a ni. Party inlungrual tak kan nih chhung chuan pawn lam miten min tichhe thei ngai lo ang,” a ti.

Thlalak : ZPM hruaitu atana ruat tharte