News

Vawiin (4.12.2025) hian Aijal Club-ah Mizorama Sorkar hriatpui bank awm zawng zawngte intawhkhawmna leh an hnathawh thlirletna State Level Bankers Committee (SLBC) for the Quarter Ending September 2025 neih a ni a, Chief Minister Lalduhoma’n a telpui.

Lalduhoma chuan CM a nih hnua SLBC a telpui tum hnihna a nih thu sawiin, “Meeting hmasa atanga tehin hmasawnna duhawm tak tak hmuh tur a awm. A lawmawm hle a ni. A bik takin CD Ratio nei tha bank pathum MRB, SBI leh Apex Bank te chungah lawmthu ka sawi a ni. Chutihrualin, bank thenkhat, loan pe chhuak tlem leh lutuk, national benchmark phak lo leh lutukte erawh hi chu en liam mai chi niin kan ngai lo,” tiin CD Ratio nei hniam ber, 5.30% chauh tlin phak bank pakhat chu an insawifiahna (explanation) a hnena thehlut rang turin a hriattir a ni.

Chief Minister chuan, Mizoram Sorkar chuan mitin ban phakah bank te hi inzarpharh ula an duh tih sawiin, Tuna branch kan neih mek 278 zinga 183 te hi Aizawl, Lunglei leh Kolasib-ah an awm . A dang 95 te hi district dang pariatah an inzarpharh a. Vawiinah hian he SLBC leh RBI hnenah, bank-te inzarpharh dan hi lo ennawn a, thingtlang mipuite ban phaka intizau turin ka ngen a ni,” a ti.

Sorkar thuchhuah tarlan danin, bank-te hi an sum dawn (deposit) tlingkhawm atanga teha zaa sawmruk (60%) tal mipuite hnena puktir (advance) tura beisei an ni. Hei hi an hnathawh tehna langsar taka hman a ni thin. Tun SLBC report-a a lan danin YES bank, Bandhan bank, SSFB, AXIS, HDFC, ICICI leh CBI te CD ratio chu 31% aia hniam vek an ni.