Nov 21, 2025
Friday
MPCC chuan vawiin hian an office-ah political session an hmang a, thusawitu MPCC General Secretary PC Laltlansanga chuan Lungleiah Mizoram State University dah a nih dawn vanga chhim lam mipuite an lawmpui thu a sawi.
PC Laltlansanga chuan Assembly House-ah Mizoram State University chu Aizawla dah turin ZPM Sorkarin a passed hnuah Lunglei mipuiin demand committee-te dina Lunglei a dah tura an nawr hnuah an nawr chhuak ta nia sawiin, “Chhim bial mipuite Congress Party chuan kan lawmpui a ni. Congress Sorkar khan Mizoram University Southern Campus hi Lungleia dah turin hma a lo la tawh ṭhin. Mizoram Engineering College pawh dahin building pawh Pukpui ah RUSA Funding 2600 lakhs sengin sak zawh vek a ni tawh,’ a ti.
Congress Sorkar a tlak tak avangin vawiin thlengin an hmalakna chhunzawm leh tihpuitlin a la ni lo MPCC GS chuan, “Chhim lam duhsaktu tak tak chu Congress sorkar kha a ni. November 10, 2025-a Cabinet meeting chuan MZSU hmunpui Lungleia dah a passed. Chumi hnu feah Lunglei North Bialtu MLA-in ni 18. 11. 2025 khan Cabinet meeting thuchhuak a hriat hnuah a ṭul chuan ka bang ang a ti tlai khawhnu kha chu drama dik tak a ni,” a ti a, Lunglei North MLA chuan Cabinet-in a rel hma khan ban a sawi ngam loh thu a sawi.
Tuna Mizoram State University, Lungleia dah tur nia puan hi Assembly a passed a la ni lo tih sawiin PC Laltlansanga chuan, “MZSU Act Amendment siam a la ni lo. Lunglei mipui bum nan ZPM hian MZSU Administrative Block chauh dah an tum nge, Academic Block dah tel an tum tih Zoram mipui hnenah sawifiah rawh se,” a ti.
