Dec 05, 2025
Friday
MPCC chuan vawiin (5.12.2025) hian an office-ah chhung inkhawm an hmang a, thusawitu MPCC President Lal Thanzara chuan BJP Sorkar chu India ramah BJP taka hmalak mekah puhin, ZPM programme-in mipui a huap kim loh thu a sawi.
Lal Thanzara chuan BJP Sorkar hnuaiah kum tin Kristiante laka hleilenna a pung zel nia sawiin, “Tun hnai lawkah pawh Nagaland-a Christian convention hmang tura sawm khawvel huapa thusawitu lar Dr. Billy Graham-a fapa Rev. Dr. Frankin Graham chu VISA an pe duh lo. BJP sorkar hian India ramah BJP takin hma an la mek. Tunah hian state 12-ah sakhaw inleh khapna dan (anti-conversion law) hman mek a ni a, kan kristian unauten namen lovin harsatna an tawk a, chanchintha hril hi a khirh takzet tawh a ni,” a ti.
BJP-ten BJP takin hma an la zel nia sawiin MPCC President chuan, “Mizoramah pawh Raj Bhavan kan neih thin chu BJP takin Lok Bhavan tiin hming min thlak sak ta. Keini Mizo Kristiante hian ngun taka kan ngaihtuah a hun ta hle. BJP te nena sam inphiar zawm party kalsan hun a thleng mek . Congress party hi chung lama innghat party kan ni a, Central a Congress sorkar leh sorkar lohah kan innghat lo, kan innghahna chu Pathian a ni,” tiin Pathianin rem a tih chuan kum 2028-ah an sorkar ang tih hi an rin tlatthu a sawi.
MPCC President chuan ZPM party-in sawhthing an lei thu leh a man an pek tlak vek thu an sawi thu tarlangin, “Kut hnathawktute kan lawmpui takzet a ni. Bana Kaih policy an neih ve thungah chuan mi 774 loan an dilpui a, bank lamin mi 257 loan a peksak thung. Congress hunlaia kan flagship programme NLUP kan lo kalpui tawh dan nen chuan tuna ZPM policy hi patla khata khai dun chi a ni lo tih kan hrethiam awm e. ZPM programme hian mipui a huap kim phak lo hle a ni,” a ti.
