AR chhuahsan ramah kut an thlak tan ta

Tukin (17.3.2026k) khan Assam Rifles chhuahsan ram Heritage Court Tlangah Aizawl khawpui chei tharna hnathawh bul tanna lungphun Chief Minister Lalduhoman a hawng. UD & PA Minister K. Sapdanga bakah Assembly Speaker, ministers leh MLA eng emaw zat an tel.

Thu sawiin Chief Minister chuan, “He ram hman dan tur reltu Advisory Committee hi mipui huapzo pawl hrang hrangte telna a ni a, a thu tlukna hi sorkar thutlukna bik a ni loa mipui thutlukna zawk a ni. A ram hman dan tur rawtna hi kan dawng hnem hle a, tuna mi ang hian kan pawm ta a ni. Rawtna dang dawn belh kan tum tawh loa, tuna mi hi kan thutlukna tawp, ding reng tawh tur a ni. Mandir sawnna hi dap a ngai a, hmun hma remchang a awm theih nan Pathian hnenah i dil ang u,” a ti.

Bazar Bungkawna mimal leh pawlten ram an neih, Aizawl Square atana siam tura tiha ram neitute be turin palai an tir dawn tih sawiin Lalduhoma chuan, kan ram tan a ni tih hriaa rilru inhawng taka lo dawr turin ram neitute a ngen a ni.

CM chuan Aizawl khawpui laili hi hmun mawi tak, naupangte tana lenna nuam, thalaite tana hmun tha, pitar leh putarte tan pawha hawi khawthawnna hmun remchang taka chantir an tum tih sawiin, “Kan zavaia tan a ni tih hriain mitinin inhawng takin he hnathawh hi i thawhpui ang u. A thawktute pawhin a hlawkna lam chauh ngaihtuah lovin kan ram tan a ni tih hriain thahnemngai takin lo thawk se kan duh a ni,” a ti.

UD&PA Minister K. Sapdanga pawhin thu sawiin, “Tukinah hian hmasawnna project pakhat kan thawk dawn a ni satliah loa, kan ramin Pathian malsawmna ropui tak a dawn kan lawm tel a ni. UT inthlan hmasa berah khan Aizawl laili atanga Assam Rifle sawn chhuah hi sawi rik a lo ni tawh a, an chhuahsan theih nan hian party tinten hma kan la vek. Vawiina sorkar hi kan vannei a, kan hunah a takin a lo thleng ta a ni. Kan zaa kan lawmna tur a ni a, lungrualna min thlentu ni nghal se a duhawm hle,” a ti.

Ruahmanna tlangpuiah chuan Saron Veng, BCM Biak In atanga intanin chhuah lamah kawngpui laih tur a ni a, Dak Inpui bulah a chhuak ang. Kawngpui thar sial leh kawngpui awmsa chei nan cheng vbc. 23 dah niin sanction pawh hmuh tawh a ni. PWD-ten an thawk ang.

Bazar Bungkawn atanga intanin Aizawl Square, mawi tak sak tur a ni.

Aizawl Square thlangah hian Police Outpost dah tura ruahman a ni.

Saron atanga Dak Inpui inpawhna kawngpui kiang hmun remchangah Aizawl khawpui laili chawmtu tur Power Sub Station bun tur a ni.

Lammual sir hmar lamah hian Vanapa Hall, mi 2,000 leng, hall leh auditorium dang nei tel, lirthei tam tham tak dahna nei sak tur a ni. Architectural Design hi inelna hmanga neih tur a ni dawn. Vawiin atangin registration tih theih nghal a ni ang. May ni 29 khian intihsiakna result puan hman tum a ni.

Vanapa Hall thar tur dawt chiah chhim lam tlang, Lammual thlir theihna remchang ni bawkah hian tuizem lian dah tur a ni a. Mawi taka chei a, mipui thutna tur tam tak siam nghal tur a ni.

Canteen kualah hian park nuam tak sak tur a ni.

Vanapa Hall thar leh tuizem dahna tur inkarah hian Public Park sak a ni ang.

Open Amphitheatre hi Dak Inpui hnaih, kawngpui thar kiangah dah a ni ang a. Multi Level Car Parking a awm bawk ang. Kawngpui thar hmun tha laiah khaw thlirna sak tur a ni.

Hmun zau tak hi Green Zone leh Walking Trails atan dah a ni.

Heritage Court, Vanapa Hall ep tlang hi chei that tur a ni a, building pariat chei that a, a thenkhat dang thiah tur a ni. Sak belh pawh a awm bawk ang. Hmun mawi taka siam a ni dawn a, cheng vbc. 13 sengin PWD in hma a la dawn a ni. Hna bul tan mai turin khawl pawh an chhawp tawh a ni.

March ni 15, 2025 khan Assam Rifle ram hi official-a Mizoram sorkara hlanna neih a ni. A kum khatna chamah a chei tharna hna kutthlak tan a ni ta.