AMC inthlana an chak chhan sawi

ZPM chuan vawiin (4.5.2026) chhun khan an office-ah chhung inkhawm an hmang a, thusawitu ZPM Vice President Lalmuanpuia Punte chuan AMC inthlana an party an chak chhan a sawi.

AMC inthlan zawh tak chungchang sawi ZPM Vice President chuan, “Kum 2010 AMC hmasa berah Congress Sawrkar khan tangrualin ward 10 chiah an la, AMC vawi hnihna leh vawi thumnaah pawh MNF-in ward 11 chiah lain an sawrkar hram. Tun tuma kan hnehna han thlir hian a sang fal hle a, a lawmawm hle. Chutih rualin keimahni party bil chakna ni lovin neutral-ten min la thlawp hle tih a hriat. Chutiang taka min thlawp theihna tura chak taka hna thawktu kan Chief Minister leh minister-te an thawh hlawk hle,” a ti.

Lalmuanpuia chuan hnehna an chan theihna atana pawimawh ber chu Pathian an lamah a tan vang a nih thu sawiin, “Pathian malsawm tlakin, Pathian lamah keini party hi tang zel turin party mipuite pawh kan khawsak dan i fimkhur zel ang u,” tiin an party mite a sawm.