Tlabung RD Block hawn a ni

Rural Development Minister Lalruatkima chuan vawiin (5.4.2025) chhun khan Mizorama RD Block 28-na atan Tlabung RD Block a hawng.

Lalruatkima chuan Mizoram history-a hmun pawimawh tak luahtu, Mizoram kawtchhuah hmasa Tlabungin RD Block an nei ta chu a lawmpui thu sawiin, 'Kum 30 chuang hnu zetah Mizoramin RD Block thar pahnih - Kawrtethawveng leh Tlabung RD Block-te kan nei leh thei chu thil chhinchhiah tlak leh hmasawnna ropui tak a ni,' tiin RD Block thar neih chu thil awl ai lo tak, harsa taka sual chhuah a nih a thu a sawi.

Mizoramah hmasawnna rualkhai a awm theihnan sorkar chuan thuneihna semzai leh kan ban phaka sorkar chhawpchhuah zel a tum a nih thu sawiin RD Minister, 'Tlabung RD Block chuan department hrang hrang hmalakna te a rawn keng tel dawn. Heng hmalaknate ti hlawhtling tur hian block mipuiten kan lo thawhpui thiam a tul dawn a ni,' tiin mipuite chu tha taka sorkar thawhpuia lo finchhuah thin turin a chah.

Lalruatkima chuan Mizoram RD Department chu ram pum huap pawha hna thawk tha an nih thu sawiin, Department thawktu zawng zawngte thahnemngaihna leh inpekna avangin an chungah lawmthu a sawi a, 'Tlabung RD Block pawh a chhunga cheng mipuite tana hmasawnna thlentu leh mi harsa zawkten lei rem anlo rah ve theihna tura hnathawktu an nih ngei theihna turin duhsakna ka hlan a ni,' a ti.

Ni 25.3.2022-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut chu a pawm a ni. Kawrtethawveng leh Tlabung RD Block-te enkawl zuina tur hian ni 1.11.2022 cheng nuai 66.42 chu Finance Department-in ni 1.11.2022 khan a allocate.