Lung zai sakten Lunglei an thleng
admin 14-Mar-2023 01:02 PMSri Ramachandra Medical College and Research Institute, Chennai-a a thlawna lung zai sak naupang panga leh anmahni kalpuitu mi parukte chu Lunglei an thleng leh tawh a, nizan (13.3.2023) khan Lunglei DC Ramdinliani'n a bangla-ah zanriah a buatsaih sak.
Lungleiah hian CSR kaltlangin Sri Ramachandra Medical College and Research Institute-a Head of Dardiology Dr JS N Murthy leh Lunglei DC hlui Kulothungan A te hmalaknain lung lam a thlawna inentirna (free clinic) buatsaih a ni.
Free clinic-ah hian naupang pangate hi an lung zai a ngai tih hmuhchhuah a ni. Sri Shankara Heart Foundation, Mathew foundation, Muthi Trust, Renyl Foundation leh Mr. Subramaniam-ten sum thahnem tak an thawh khawmin naupang pangate hi a thlawnin Sri Ramachandra Medical College and Research Institute-ah an lung zai sak an ni.
Naupangte hi an lung a thlawna zai sak an nih piah lamah, anmahni hruaitute nen kal man, haw man, damdawi-in awm man zawng zawng a thlawna tihsak vek an ni.
Heng lung thalo zai mi panga te hi mipa vek niin kum 2 – kum 14 inkar an ni a, zai an nih hnuah an dinhmun a tha chho viau a ni.
