News

YMA Sub. Hqrs., Lunglei chuan H Ramdinpuii (15), Mualthuam North tualthihna chungchangah thuchhuah siamin, Mizoram Police, a bik takin Lunglei Police Special Investigation Team (SIT) te chungah an lawmthu tarlangin, “Hun kaltaah pawh Lunglei Police-te misual hnuchhui kawngah an fakawm thin tak zet a ni,” an ti.

H Ramdinpuii tualthihna chungchanga YMA Mualthuam North Branch, YMA Vanva Group-hruaitute leh member-te hmalakna a chhuanawm an tih thu tarlangin YMA Sub. Hqrs., Lunglei chuan, “Pawikhawihtu chhuinaah police-te theihtawpa an thawhpuina pawh a hluin, khawtual boruak hrehawm tak hnuai a khawtlang tana ke an penna a hlu kan ti. He vanduaina thleng chhana an tlawmngaihna leh thawhrimna a ropuiin, khawtlangin hun harsa tak leh nu nau thlabar te, muan an ngaih hun ah hruaitu leh member-te an inchhi eng hian, YMA mai ni lo; Mizo hmel a ti mawi,” tiin an chhuan takzet thu an tarlang.

YMA Sub. Hqrs., Lunglei chuan H Ramdinpuii hliamna tak tuar a, rawng taka a nunna laksak a ni hi an lainat takzet tih tarlangin, “Tualthattu-te hi kan dem tak zet a ni. Hetianga tualthihna rapthlak tak kan khawtuala a thleng ta fo leh, hmeichhe awm nem leh chak lo zawkte tana kan khawtlang a ralmuang tawk ta lo nia lang hi, a pawi kan ti hle a ni. He tualthihna rapthlak taka pawikhawihtute hi thuneituten, an phu ang ngei hremna pe ngei se tih hi kan duh dan a ni. Hetiang thil rapthlak tak kan hnam leh Kristian kan nihna thlenga min ti thang tlawmtu hi thleng nawn tawh lo se, kan duh tak meuh,” an ti.

H Ramdinpuii kalsan tak chhungkua leh laina bakah, he thihna in a tuam Mualthuam North khawtlang mipuite, Pathianin thlamuanin awmpui se tih chu an tawngtaina a nih thu YMA Sub. Hqrs., Lunglei chuan an tarlang.