Sep 21, 2026
Monday
Zakaria Lalhriattluanga (29) s/o VL Duailova, New Builum thihna kaihhnawiha police-in an man mi paruk chu court-a hruai an nih hnuah vawiin (21.9.2026) tlai khan District Jail, Kolasibah dahluh an ni a, mi pahnih chu kumtling lo an nih avangin Juvenile Justice Board (JJB) kutah hlan an ni.
Police atanga thudawn danin, a tirah chuan mi pariat aia tam lak an ni a, a hnuah mi pariatte chu hrenzui an ni. Jail-a dahluhte hi mipa panga leh hmeichhe pakhat an ni a, mipa pahnih chu kumtling lo an nih avangin JJB kutah hlan an ni. An vai hian Kawnpui Hmarveng vek an ni.
Hetihlai hian Zakaria Lalhruaitluanga ruang chu vawiin (21.9.2026) hian postmortem a nih hnuah, tlai dar 2:30 vel khan vui a ni.
Tarlan tawh angin, Zakaria-a hi Assam Regiment a ni a, chawlh hmanga a lo haw a thianpa nen an khaw lam pana an tlan chu Bualpui daia intihbuainaah a thi a ni. Police chuan he thil thleng hi an la chhuizui mek zel a, man belh tur pawh an la awm maithei.
