Aug 27, 2026
Thursday
Vawiin (28.8.2026) Assembly Session-ah Chief Minister Lalduhoma official resolution putluh “That ‘Ro min relsak ang che’ by Rokunga be declared as the State Song of Mizoram” tih chu sawiho a nih hnuah lungrual taka pawm a ni. CM chuan a official-a sak a nih laia awm dan turah mipuite hnena ngenna a nei nghal.
‘Ro min relsak ang che’ hla chuan Pathian chu hnam tin chunga roreltu leh kulhpui nghet, lal berte lal ber a nih zia a puang chhuak tih sawiin Lalduhoma chuan, “Kan ram leh hnam min hruai a, min humhim a, ro min relsak tura tawngtaina hla a ni. He hla hi official-a sak a nih a piangin ding chungin kutphah ding lam lung zâwna dahin, rilru tawngtaina nena sa thin turin kan inngen nghal a ni,” a ti.
Chief Minister chuan, India ram danpui in state song neih a khap lem loh thu a sawi a, “State 14 vel chuan an nei tawh niin kan hria a, national anthem leh national song nena inkalh zawnga state song neih chu a remchang lo. August 10, 2026-a Cabinet Meeting chuan state song neih ve ngei tul a ti a, state song atan Pu Rokunga phuah ‘Ro min relsak ang che’ tih hi lungrual takin kan pawm ta a ni,” tiin state song neih chungchang a sawi.
