News

Nimin (25.7.2026) khan LPS Arena, Falkland,ah Joint Hnampual Meet-2026 programme chu Joint Hnampual Students’ Organisation (JHSO) bultumin buatsaih a ni a, khuallian Chief Minister Lalduhoma chuan sorkarin minority-te a ngaihsak thu a sawi.

Chief Minister chuan thu sawiin, “Mizorama hnampual zirlai pawl pasarihten unau kan nihzia hriaa Joint Students’ Organisation an din hi a lawmawm hle. Inpawhna tha zawk awm theihna tura intawhkhawmna (meet) buatsaih a nih chu lawm ka ti a, meet thupui, ‘Zofate kan ni, inen hrang thei kan ni lo’ tih hi a taka nunpui a pawimawh,” a ti.

Sorkarin minority-te a ngaihsak thu sawiin Chief Minister chuan, “Minority-te sawmna chu ka ngai pawimawh a, a rem chuan ka tel zel,” tiin kut hrang hrang- BSA huaihawt Tlanglut Kut kum kalta October1-a Khawmawia neih te, Saipuma HSA buatsaih Sikpui Ruoi-ah te, Vathuampuia PZP buatsaih Naumariamlak Kut-ahte leh zirlai pawl leh Thangram Indigenous Tribal Movement-te buatsaih Thangram Cultural Meet-ahte leh Joint Hnampual Meet-ahte a tel thei lawmawm a tih thu a sawi.

Lalduhoma chu Mizoram chu a chhunga chengte inngeih taka an chen theihna chhan pawimawh tak chu hel pawl awmlohna state a nih vang a nih thu sawiin, “Mizoram hi state ralmuang taka chantir ngei tumin Mizoram Sorkar chuan theihtawp a chhuah a, sorkar hmalaknate a kal tluang a, kumin April 30 khan hnampual hel pawl awm chhun HPC (D) Lalhmingthanga Sanate Faction-te chuan ralthuamte tungin, Mizoramah hnampual hel pawl awm tawh loin, remna leh muanna chu a tak ramin a lo thleng,” a ti.

Joint Hnampual Meet buatsaihtu JHSO hi hnampual zirlai pawl hrang hrang- Mizoram Bawm Students Union, Ranglong Student Union, Hmar Student Association, Pang Zirlai Pawl, Siamsinpawlpi, Lai Student Association leh Mara Student Organisation inzawmkhawm an ni.