Smart meter chungchang sawiho a ni

Vawiin (31.8.2026) chhun khan Power & Electricity Minister F Rodingliana hoin a office-ah RDSS Scheme hnuaia smart meter vuah mek chungchang hmalakna leh harsatnate separtment official-te’n an sawiho.

Meeting-a tarlan a nih danin, India ramah electric kal ral (loss) tam tham tak tihhniamna turin, Ministry of Power chuan RDSS: Loss Reduction Scheme a duang chhuak a, he scheme hnuaiah hian smart meter vuah runpui chu ram pumah neih a ni ta a ni. Central Electricity Authority (CEA) (Installation and Operation of Meters) Regulation 2026 chuan communication network (internet signal) awmna tawh phawtah chuan smart meter hmang chauhin electric supply pek tur a ni. Amaherawhchu, pre-payment (prepaid) smart meter erawh electric hmangtute duh thlannaah dah a ni.

Mizoramah hian electric consumer 3,20,000 vel kan awm a, chung zinga 34,300 vel chu meter chhia (reading kal lo) a ni. Heng bakah hian meter eng emaw zat chu electric hman dan teh dik tawk loh a awm ngei tih hriat a ni . Hengte avang hian Mizoram chhungah electric kal ral (power loss) tam tak a awm phah a, he loss tihniam tur hian Central Sorkar hmalakna zarah smart meter vuah hna chu Mizoramah pawh thawh a ni ve. Tun dinhmunah smart meter 82,000 vel vuah tawh a ni a, smart meter vuah tawhte zingah vuah thar tirh a bill tam deuh 24.67% vel an awm. Nimahsela, a hnuah a tam chhunzawm chuang lo a; chutihrualin, bill tlem zawk pawh 30.24% lai an awm ve tho.

Tarlan tak meter dik tawk lo te chu smart meter a thlak a nih hnu hian electric hman zat dik tak hriat theih a lo ni ta a, mi thenkhat bill a tam chhan pawh hi niin a lang. Billing period tihsual palh te, meter thlak laia manual reading lak sual palh te, sim card communication fel lo vanga bill a huna chhuak lo te leh thil dang tam tak avangin bill tam emaw, harsatna engemaw a awm thei. Hetiang avanga harsatna tawkte puihna tur leh complaint thehluhna tur Customer Care Centre(CCC) te nasa zawka puanzar rel a ni a, electric bill chungchanga harsatna neite chuan landline telephone number 0389-2310169/2322174, Whatsapp No. 8132801559/6009192434 emaw, mahni bialtu Electric Department Office-ah harsatna te thlen theih reng a ni a, P&E Department chu mipui harsatna chingfel turin a inpeih reng.

Meeting-ah hian electric bill complaint a luhin, a dik leh dikloh finfiah hmasa lova bill pe hmasa tura lo nawrluitu electric duty an awm thin anga sawi a awm thu pawh sawichhuah niin, hetiang ang harsatna tawk an awm chuan department hotute hnenah hriattir vat turin mipuite ngen an ni.