Pawisa tihchingpen duh lohna kawng zawh huaihawt

Tukin (16.6.2026) khan mi bank account-a a neitu phalna loa pawisa laksak duh lohna kawng zawh North Hlimen VC leh All NGO chuan an huaihawt.

North Hlimen khawtlang hruaitute atanga thudawn danin, T. Neihsangi (39), Bank Bussiness Corresondent (BC) N. Hlimen mi, N. Hlimena thawk chhuan chhungkaw 15 vel sum a tihchingpen sak a ni. Account neitu hriat lohin an bank account a mi a lo khawih kual ṭhin. A pawisa tihchingpen hi mimal leh Self Help Group pawisa telin cheng nuai 35-40 inkar vel a ni. T. Neihsangi hian pawisa a khawih dan ber chu mi ATM card, bank nena thlunzawm zawk aman a ruka kawlin a lem zawk pe chhuakin a neitute hian a tak tak emaw tiin ngaihṭha takin an kawl a ni.

An bank nena thlunzawm ATM card hmang hian pawisa a lo khawih sak ṭhin a ni. Mi ṭhenkhat erawh ATM T. Neihsangi an kawl tir aṭangin a khawih sak. T. Neihsangi hian kum tam fe kal tawhah khan mi account a pawisa tihchingpen chungchangah hming hliauna a nei tawh ṭhin.

Pawisa a rulh leh ṭhin avangin police-a thlen a, case siam sak a awm ngai lo a ni. Tunhnai lawka hetianga a pawisa khawih sak, a rulh leh tak, a tih lungawi pawh chhungkua an awm nual a ni.

Heng a pawisa khawih sak bakah hian pawisa an account-a thunsak tura an thehluh, lo thunsak lova a lo hman sak te, Self Help Group aṭanga loan la, an loan rulhna tura pawisa an pek luh, loan a lo rulh sak leh si lohte pawh a awm.

Heng a pawisa khawih sak te hi mi harsa ve te te, in leh lo dinna tura rei tak pawisa lo khawl ve hram hram te, an kuhva, hmunphiah leh thlai hralhna man an lo khawl hram hram te a ni. Pitar pakhat, cheng nuai 2 chuang a khawih sak phei chu a fapa mi ang lo nen chauha khawsa, a pasal boral ta bank-a insurrance a tih pawisa a lak, in leh lo dinna tura bank-a a dah a ni. Putar pakhat, amah chauha khawsa pawh ₹ 50000 chuang a lo khawih sak bawk.

He thil thleng hi N. Hlimen a pawl hrang hrangte chuan a duh lovin VC, YMA, MHIP, Self Help Group ten a hrang ṭheuhin thuchhuah an lo nei tawh. Tukin khan ‘Pawisa tih chingpen duh lohna kawng zawh’ VC leh All NGO huaihawtin neih a ni. VC leh All NGO hian joint committee-te neiin hmalak zel an tum.