Nihar Kanti Chakma-in ngaihdam a dil

West Tuipui Bialtu MLA Nihar Kanti Chakma chuan a thuziah darh chungchangah hriatthiamna leh ngaihdamna dilna a ti chhuak.

Nihar Kanti Chakma chuan, “Artificial Intelligent (Al) hmanga ka flyer siam chungchangah tum loh deuhin, Tlabung Branch YMA leh khawtlang mipuite pawi ka sawi palh a, hnam anga inhnialna chawk chhuak thei thil leh midang rilru tina thei ka sawi palh hi pawi ka ti takzet a ni,” a ti.

Tunlai khawvel thiamnain a ken tel Al hi a zir tan ve tih tarlangin Nihar Kanti Chakma chuan, “Motor khalh thiam tir angin ka lo fimkhur tawk lo a, kan tawng (Chakma) a ka ziah, Al hmanga English tawnga ka lehtir chu nguntak leh fimkhur taka lo enfiah leh nachang ka hre lo a, rin loh deuhin a lo viral ta bawk si a, pawi ka ti takzet a ni,” a ti.

Nihar Kanti Chakma chuan a bikin, Tlabung Branch YMA leh khawtlang mipui chungah he thil tihpalh avang hian thinlung takin hriatthiamna leh ngaihdamna a dil tak zet tih tarlangin, “Zirlai tha tak min zirtir a, tun hnua fimkhur min zirtirtu tha tak anih ngei pawh ka beisei a ni,” a ti.

Tarlan tawh angin YMA Branch, Tlabung chuan thuchhuah siamin, West Tuipui MLA pawh lo ni tawh, politician zahawm tak pakhat chuan tunhnai khan Tlabung chu Chakma-te khaw hlun (homeland) thin a nih thu leh kum 1898-a British rorelna hnuaia awm tura Lushai Hills-a Tlabung rin luh a nih hma zawng kha chuan Chittagong Hill Tracts-a bet thin, Chakma-te luah chin ram niin a sawi. He a thusawi, belhchian leh chhui dâwl lo hi media hrang hrangah zau taka thehdarh a nih avangin YMA, Tlabung Branch chuan an ngai thutak hle a ni.

File photo