News

MZP chuan thuchhuah siamin, “All Mizoram Petroleum Dealers Association (AMPEDA) inti ten nimin September 9, 2026 (Nilaini)-a thuchhuah an siam chungchanga MZP hming lo lang chungchangah, Mizo mipuite hriatah thil sawichian ngaiin kan hria a ni,” an ti.

An tarlan danin, MZP chuan September 23 – 25 2026 hian Darlawnah Assembly a nei dawn a, chumi atan chuan LT Brothers Filling Station, Keifangte chuan assembly atan hian sum an rawn thawh a,
tihluihna leh kut inthlakna pakhat mah a awm lo. He petrol pump hi Lalthanzauva ta ni thin,
Sandeep, Haryana hnenah a hralhin, pawisa pawh an inhlan fel vek tawh thu hriat a ni. Tunah hian
a enkawl tur hian manager atan Nitesh-a an hmang mek a ni.

Mizorama petrol pump tam tak hi a hmun leh license Mizo ni si, hnam dang (vai) in a an enkawl, a neitu nihna nei tam tak an awm a, Mizote hian hnamdang (vai) nena inrem siamin sum tam tak hlawhin an ram leh license hi an hmantir nasa hle a ni. MZP chuan heng hnam dang
Mizo hming hawha petrol pump neite hi a hre vek a, political party a inhmang tak takte pawh an
awm a, MZP chuan a tul angin hengte hi enzuiin hma a la zel dawn a ni.

MZP Assembly lo awm turah pawh Mizo mahni hming hawha sumdawn tirte chungchang hi a ngaihtuah dawn a, “Mizo hming hawha hnam dang sumdawn tirte na taka hremna dan sawrkarin siam se, a tul anga dap chhuah thin ni rawh se” tih chu agenda atan dah a ni.

MZP chuan, “Hetianga hnamdang thlavang hauh leh thurualpuitute avanga AMPEDA inti ten petrol pump an khar chhung hian, hnamdang sumdawn tir ve lo petrol pump neitu Mizote chu inkhar ve lo turin
kan ngen a, mipuite pawh heng hnam dang sumdawn tirtute hi hnualsuat a, dawr chhunzawm lo
ngam turin kan ngen a ni. Sawkar pawhin, heng dan dik lova sumdawngte hi dap chhuak a, an sumdawn phalna tih tawp sak turin kan ngen nghal bawk a ni,” an ti.