MZP-in petrol pump khar an tum an thulh

MZP chuan zanin (16.9.2026) hian thuchhuah siamin, Home Secretary Vanlalmawia kaihhruaina hnuaiaah vawiin hian All Mizoram Petroleum Dealers Association (AMPEDA) te nena thukhawmin an rel angin, AMPEDA chuan MZP laka an thilphutte an hnuklet leh ta tih tarlangin, “Chuvangin, September 17-a petrol pump khar kan tum tawh pawh kan thulh ta a ni,” an ti.

Naktuk atanga Mizoram chhunga hnam dang enkawl leh hnam dangte thawhna petrol pump khar tura MZP Headquarters, Sub-Headquarters, Branch leh Hnampual zirlai pawla an thawhpuite hnena hriattirna MZP-in a lo tihchhuah tawh chu Mizoram Sawrkar ngenna avang leh mipuite hmakhaw ngai chungin tihtawp rih a nih thu tarlangin, ” Heng hnamdang pump enkawlte chungchangah hian MZP chuan a tul angin hma ala la chhunzawm zel dawn a ni. Hnamdang Mizo hming hawh leh hnamdang (vai) sumdawng an rawn pung chho zel hi a vei tak zet a, MZP Assembly lo awm turah pawh, ‘Mizo hming hawha hnam dang sumdawn tirte na taka hremna dan sawrkarin siam se, a tul anga dap chhuah thin ni rawh se’ tih chu rel tur zingah dah tel a ni,” tiin a tul angin Assembly rorel bawhzui hian MZP chuan hnamdang sumdawngte dapchhuah kawngah hma ala chhunzawm dawn tih an tarlang.

MZP chuan, Mizoram leh hnam himna atan theihtawp an lo chhuah tawh thin tih tarlangin, “Kan ram kan hnam a him zel theihna turin hma a la chhunzawm zel dawn bawk. Mizo mipuite pawh sum leh paia hlawkna ringawt um lova, kan ram himna leh kan hnam damna tur atan kan hming leh ram te hnamdang hawhtira, sumdawnna atan hman tir lo turin a ngen a. A tul anga dapchhuah kawngah Zoram mipuite thawhpuiah a sawm a, abik takin Village/Local Council leh tlawmngai pawl hrang hrangte a sawmin a ngen a ni. Tin, sumdawnna atana mahni hming hawh tir mekte pawh, ram leh hnam a lo him zawk theih nan hnamdang an thawhpuina titawp vek turin kan ngen nghal bawk,” an ti.