News

Mualthuam North VC leh All NGO (YMA, MUP leh MHIP) chuan thuchhuah siamin, an khaw mi H Ramdinpuii (15) thatttu man chhuah kawnga hmalatute chunga an lawmthu leh hnuchuitute an thawhpui that thu tarlangin, tualthattute chhungkua rikrap zawnga che lo turin an in ngen.

Mualthuam North LC leh All NGO chuan August 3, 2026 (Thawhtanni) zan a bo, H.Ramdinpuii (15) d/o H.Lalawmpuia Mualthuam ‘N’ khua rawng taka thattute Denghmingthanga (20) s/o Tc. Lalramdina leh Lalneihkima (34) h/o Rosanglianite man chhuah an ni ta chu lawmawm an ti hle tih tarlangin, “Hetianga rawng taka tualthattute hi kan dem tak zet zet a ni. Naupang pawisawilo rawng taka thattu kan tualchhunga an awm hi a pawi kan tiin zahthlak kan ti hle bawk a ni. Tualthattu zawnchhuahna kawnga hmalatu Mizoram Police, a bik takin Lunglei Police Special Investigation Team (SIT)-te leh Forensic Science Laboratory (FSL)-te thawhrimna leh inpekna ah lawmthu kan sawi a, hmalakna chak taka a kal theihna tura thlawp tlattu kan sawrkar chungah pawh lawmthu kan sawi a ni,” a ti.

H.Ramdinpuii thattu chhuichhuah kawngah Mualthuam ‘N’ khawtlang mipuite inpekna leh a tul anga police-te tha taka an thawhpuina ah lawmthu an sawi tak zet zet tih tarlangin Mualthuam North VC leh All NGO chuan, “Hetih lai hian khawtlang mipuite dem zawng leh police lam thawhpui thalo anga social media lama phochhuak duh kan awm erawh pawi kan ti,” tiin pawikhawihtu zawnchhuah a nih thuai theihna tura khawtlang mipuiten police-te theih ang tawka kan puih zia chu police lam chu a hrechiang tute an nih ngei an rinthu an tarlang.

Mualthuam North VC leh All NGO chuan, “He tualthihna rapthlak taka pawikhawihtute hi thuneituten an phu ang ngei hremna na thei ang ber pe ngei se tih hi kan duh dan a ni. Tualthattu hriatchhuah a nih hnu ah khawtlang hruaitute ngenna zah thiama tun thlenga boruak tha lo dang kan tawnglo hi a lawmawm kan ti a, khawtlang mipuite chungah kan lawm tak zet a ni. Pawikhawihtute ber man chhuah an nih takah chuan an phu tawk hremna pek an ni ngei dawn a, tualthattute chhungkaw chungah erawh a pawngpawrh zawng leh an chhungkua rikrap zawnga khawsa lo turin kan in ngen a ni,” an ti.

He an chhiattawhna chhana khawngaiha, lainattu Zoram dung leh vang leh Zoram pawna Zofa awm zawng zawngte chungah lawmthu sawiin Mualthuam North VC leh All NGO chuan, “Chhiattawk chhungte tana theihtawp a tawngtai chhunzawm zel tur pawhin kan beisei che u a ni,” tiin H.Ramdinpuii’n a kalsan tak chhungkua leh thenrualtha, he thihnain a tihnat zawng zawngte Pathian thlamuanna leh awmpuina chang se an duh takzet tih an tarlang.