MPCC President-in an party-ah mi a lawmlut

MPCC chuan vawiin (18.9.2026) chhun khan an office-ah political session an hmang a, thusawitu MPCC President Lal Thanzara chuan, “Kan party a beiseina neia mithar lawmluh tur kan nei hi a lawmawm tak zet. Kan ram, kan hnam, kan sakhua him nana hma min lakpui tura inlo penchhuak hi kan lawm takzet a ni,” a ti. MPCC tarlan danin, MPCC President hian voters 34 an party-ah a lawmlut.

Pathian leh mipuite zarah Congress an sorkar leh dawn tih sawiin Lal Thanzara chuan, “Corruption awm lo, kut hnathawktute thlai hralh leh sawngbawlna kan ngai pawimawh dawn . Ṭhalaite eizawnna turah theihtawpin hma kan la dawn a ni. Tunlaiin Zoram hmun tin maiah kawngpui chauh ni lo, fehkawng te thlengin tuilet hnua kawngchhiat ber tum kan tawng mek hi a vanduaithlak. Central-in an pawisa siamna NHIDCL-ten kawng an siam a, a mam pur mai a, kum 15 daih chu khawilamah, fur khat pawh a daih lo,” a ti.

Central a Congress sorkar laiin kum 2005 khan mipuite leh sorkarte langtlang taka an indawr nan, corruption ven nan tiin Right to Information (RTI) Act an siam tih sawiin MPCC President chuan, “Chu chu tuna kan ZPM sorkar hian an pawngsual mek a ni. Mipuiten an thil hriat duh an zawt a, RTI zawhna reng reng a chhanna tur a concern minister-te hriatpui hmasakte a ngai a ni awm e, chumai bakah an chhang tha duh lo bawk a, chhan duhloh pawh an nei a ni awm e. Corruption dah bo nana tih chu hliahkhuh nan sorkar hian a hmang mek a ni,” tiin RTI chhanna pek duh loh vanga HC a sorkar a zual kote hi tunhmain hriat a nih ngai loh thu a sawi.