MNF Sr. VP hoin PAMRA leh Ex-MNA an inkawm

Vawiin (11.6.2026) chhun khan PAMRA leh Ex-MNA Association hruaitute chu MNF Senior Vice President Dr. R.Lalthangliana kaihhruaina hnuaiah MNF President room-ah an inkawm a, tun laia Zoram khawvel politics boruak hrang hrangte an thlirho nghal.

MNF Sr. Vice President chuan MNF-in Mizoram independence puan kum 60-na an hman chhoh lai mekin, Mizoram leh hnam tana zalenna sualtute Ex-MNA Association leh PAMRA, hun rei tak zalenna suala ram hnuaia lo awm tawhte’n co-ordination committee din a, lungrual taka kal ho zai an rel chu lawmawm a tih thu a sawi a, ram tana an lo thawhrim tawhna leh inpeknaah a fak.

Dr. R. Lalthangliana chuan under ground hun lai te, over ground-ah pawh MNF-te an lokal tawh danah mipui duhthusam lo lai a awm ang tih an rin thu sawiin, “Chutiang thil awm palhah chuan ngaihdam kan dil tak ze,” tiin hmasawn zel tur leh tun lai khawvel mil anga inzir zelin MNF chu an kal mek zel thu a sawi.

Politics-ah hamthatna um avanga Zoram tana zalenna sualtute sawinep tumna leh sawi bawrhban tum an awm mek a pawi takzet tih sawiin MNF Sr. Vice President chuan, “Hei hi inzirtirna dik lo a ni tih thangtharte leh Zoram mipui hian i hre nawn fo ang u,” a ti.