Mizoram Police-in thuchhuah an siam

H Ramdinpuii (15), Mualthuam North thattua puh Denghmingthanga (20), Lunglei Police Station atanga a tlan chhuah hnua man a nih chungchangah Mizoram Police-in thuchhuah an siam a, judicial custody-ah (jail-ah) dah a nih leh tawh thu an tarlang.

Mizoram Police thuchhuah :

Ni 1.9.2026 zing lam dar 1:00 ah khan police remand-a awm lai, Denghmingthanga (Kum 20) s/o Ramdina, Mualthuam North, Lunglei District, Lunglei PS case No. 84/2026 Dt.5.8.2026 U/S 103(1)/140(1) BNS a man chu Lunglei Police Station atangin a tlan bo a ni.

A tlan bo tih hriat a nih veleh hian rang takin Lunglei Police-ten an zawng chhunzawm nghal. 2ndBn. MAP, YMA branch hrang hrangte, Local Council leh VDP Unit hrang hrangten an zawnpui nghal bawk. Lunglei khawchhung CCTV-a a landanin Rahsi Veng lamah a kal ni a hriat a ni . Hemi hnu hian chhun leh zan zawmin Rahsi Veng, Venghlun, Sazaikawn, Vanhne khua leh Thuampui khaw dai, Hmawngva lui leh Tlawng lui kam thlengin police leh khawtlang mipui tlawmngaiten ram hnuai pilril takah te an zawng a ni.

A ni thum ni, 3.9.2026 tlai lam dar 4:30 PM khan Police leh VDP member eng emaw zat, SDPO Lunglei kaihhruaia chhuakte chuan Vanhne leh Thuampui inkar rama, thlamah an hmu ta a ni. Denghmingthanga hi him takin Lungleiah hruai thlen a ni a, medical check-up neih a nih hnuin, Judicial Magistrate hma ah hruai a ni a, Judicial Custody a dah luh nghal a ni.

Police-te thawhpuitu khawtlang mipui leh NGO zawng zawngte chungah lawmthu kan sawi a, chutihrualin thubelh chian dawl lote thehdarh lo turin mipuite kan in ngen bawk a ni.