News

Mizoram Sawrkar buatsaihin vawiin (5.9.2026) hian “Learning from the Past for a Resilient Future” tih thupui hmangin Aijal Club-ah Mizoram Chief Secretary lo ni tawhte nen inkawmhona hun buatsaih a ni a, Chief Minister Lalduhoma chu khuallian a ni.

Mizoram Chief Secretary lo ni tawh mi pali – M. Lalmanzuala, Vanhela Pachuau, Lalnunmawia Chuaungo leh Dr Renu Sharma te he hunah hian an tel. Mizoram Chief Secretary Khilli Ram Meena hoa buatsaih he programme-ah hian anmahni chawimawina hun hman a ni.

Chief Secretary lo ni tawh damlai zingah he hun hmang tura tel thei lo mi panga – Lalkhama, F Pahnuna, Lalfak Zuala, Haukhum Hauzel leh L. Tochhong te thuchah (message) chu Mizoram Chief Secretary nilaiin a chhiar chhuak.

Chief Minister chuan Chief Secretary lo ni tawhten Mizoram hmasawnna tura an ngaihtuahna, an tha leh zung nasa taka an lo sen tawh avanga chawimawina chauh ni loin, he hun hi an tawnhriat atanga finna an lo chharchhuah tawh te hmanga tuna thawk mek officer-te fuihna leh finchhuahna hun a nih thu sawiin, “Heng kan Chief Secretary te hian an hunlaiin hun khirh tak tak an lo paltlang tawh a; khang hunlaia thilthleng te leh tun lai chu danglam tawh mahse, sawrkar hnathawkte hnathawh chhan mipui rawngbawl hna erawh a la danglam chuang lo a ni,” a ti.

Vawiin programme hi session hniha then niin, hun hnihna ah hian M. Lalmanzuala, Vanhela Pachuau, Lalnunmawia Chuaungo leh Dr Renu Sharma te chuan Chief Secretary an nih laia an thil tawnte leh officer-te fuihna thu an sawi. Kalkhawmte nen sawihona leh zawhna leh chhanna hun an hmang a ni.

Session hnihnaah vek hian Home Secretary Vanlalmawia leh Planning Secretary David Lalthantluanga ten Mizoram hmalakna bakah state leh district a sawrkar inrelbawlna kalpui dante an sawi.