Mipuite chiai lo turin ngen

Vawiin (9.9.2026) hian Disaster Management and Rehabilation (DM&R) Minister Prof Lalnilawma chuan tunlai ruahsur nasa avanga Mizoram hmun hranga hranga harsatna thleng mek chungchangah mipuite chiai lo tur leh harsatna tawkte chu thuneitute hnena thlen thuai turin a ngen a, “DM&R te koh theih rengin kan awm a ni,” a ti.

Video kaltlanga thuchah tichhuakin DM&R Minister chuan, tunhnaia ruahsur nasa avangin hmun hrang hrangah lei min leh kawng ping a awm thu leh heng harsatna tawkte tanpui turin khua leh veng tinah Zonal Officer an awm tih sawiin, “Heng bakah hian Village Level leh Local Level-ah Disaster Management Committee a awm. DC tinte kaihhruainain Disaster Management Committee din vek a ni bawk,” tiin anni hnenah hian harsatna leh buaina tawk ten rang taka report thin turin a ngen a ni.

Prof. Lalnilawma chuan mpuiten smart phone application kaltlanga harsatna an thlen theihna tur DM&R Department chuan Khuarel App a siam chu hmang tangkai turin mipuite a chah a, “A bik takin veng chhung leh khaw kar kawngah leiminin kawng a lo hnawh ping emaw, a lo dang a nih chuan he Khuarel App hmang hian report thehluh theih. Zonal Officer te leh DC-ten an lo hmu vat anga, hmalak dan tur rang takin an ngaihtuah thei dawn a ni,” a ti.