MHTC-in an dincham an lawm

Vawiin (15.10.2025) chhun khan Mizoram Hindi Training College (MHTC) chuan an kum 50 tlin an auditorium-ah an lawm a, Higher & Technical Education (H&TE) Minister Dr. Vanlalthlana’n a hmanpui a, Hindi tawnga ziah lehkhabu 15,000 chuang awmna leh tunlai thiamna hmanga thuam, New Age Learning Centre and Fully Automated Library a hawng nghal.

H&TE Minister chuan thingtlang lamah zirna tih hmasawn a ngaih nasat thu sawiin, ‘Zirtirtu indaih lohna awm thinte tihrem a nih theih nan sawrkarin hma a la. Aizawl khawpuia zirtirtu inbengberek nasa lutuk leh thingtlang lama zirtirtu indaih lohna nasa takte siamrem tura hmalakna kal mekah, zirtirtu thenkhat hnen atangin, mi lian leh thil tithei zawkte puna, insawn lo tura insawipui leh nawrnate a awm thin. Hetiang thil hi ti lo turin ka duh. Ram leh hnam tana tha thei ang ber turin sawrkar chuan huaisen taka hma a la zel dawn,’ tiin mipuite tawiawmna a ngen.

Mizoram Hindi Training College-in kum 50-na a thlen theihna tura sul lo sutute leh thawktute thawhrimnaah lawmthu sawiin Dr Vanlalthlana chuan, Hindi pawimawhzia a sawi a, ‘India ram zau zawk daidar tur leh eizawnna leh hna hrang hrangte thawka, ram pawna chhuak thei turin tunlai khawvelah Hindi thiam a pawimawh takzet tawh a ni,’ tiin MHTC zirtirtute chu awmze nei lehzuala Hindi zirna kalpui tur te, zirlaite’n ziak leh chhiar mai ni lo, a tawng a tawng an thiam tak tak theihna turtea nasa lehzuala tan la turin fuih.

Mizoram Hindi Training College hi kum 1975 khan Mizoram Sawrkar leh Central Institute of Hindi, Agra te tangkawpin an din a ni a, India hmarchhaka Hindi medium-a zirtirtu trainingna hmun awmchhun niin, National Council for Teachers Education (NCTE) pawmpui thlap an ni. Tun dinhmunah, MHTC-ah hian course pathum – Hindi ShikshaParangat (B.Ed); Hindi Shikshan Praveen (D.El.Ed) leh Hindi Shikshan Kaushal te kal pui mek a niin zirlai 100 vel an awm mek a ni.