K Laltluangkima chanchin tlangpui

ZPM-in Rajya Sabha MP candidate atana an puan tak K. Laltluangkima hi ni 16.10. 1963-ah khan Saitualah a piang a, a pa chu Upa Tlanghmingthanga (L), a nu Darngeni niin, Vanlalruati Khiangte nen 1990-ah an nei a, fa hi mipa pahnih leh hmeichhia pahnih an vai hian nupui pasal an nei vek tawh a ni.

Tunah hian Mission Veng, Aizawlah an cheng mek. St.Anthony’s College aṭangin Bachelor of Commerce a zo va, Trinity & All Saint College, Leeds atangin Christian Communication Studies a zo bawk. Maryland, USA aṭangin Master of Plumbing a zo leh a ni.

Kum 12 chhung Synod Electronic Communication Department-ah manager hna a thawk tawh bawk. Mission Veng Branch KṬP-ah OB post lo chelh kim vek tawhin, Synod tihchhuah Kristian Naupang chanchinbu hi a bul ṭantu niin, Mission Veng Branch YMA-ah President a lo ni tawh bawk.

Kum 1997-ah khan MNF (N) tuna ZPM party ni ta hi a zawm a. CCF kaihhruainain kum 1998-ah khan Bilkhawthlir Bialah MLA candidate a ni lo ni tawh a ni. Tunah hian ZPM Party-ah Committee sang PAC Member Secretary leh Spokesperson nihna a chelh mêk a ni.

Tarlan tawh angin Rajya Sabha MP hi MLA chauhin an thlang a, ZPM candidate tur K Laltluangkima hi Mizoram Rajya Sabha MP thar tur tia puan theih a ni.