Jr. Grade of MAH&VS hnalakah thil fel lo a awm?

MZP chuan vawiin (23.5.2026) hian Aizawl Press Club-ah press conference neiin, MPSC buatsaih Jr. Grade of MAH&VS Direct Recruitment chungchangah thil fel lo a awm ngei niin an hriat thu an sawi.
Grade of MAH&VS Direct Recruitment chungchangah hian May 17, 2026 khan MPSC hmuin an sawipui tih sawiin MZP hruaitute chuan, “He hnalak chungchanga thil fello te siamthat ngei a nih theih nan MPSC thuneitute hnenah kan lo thlen tawh a ni. Hemi tuma MZP-te Controller of Examination, MPSC-in thudik tawk lo, Jr. Grade of MAH&VS Direct Recruitment hi exam ala nih loh thu min hrilh leh MPSC Secretary room-ah ngei pawh chutiang ang thu Controller of Examination-in hi hriatthiam har kan ti. MPSC zahawmna a bo mai loh nan hetiang thil hi thleng nawn tawh lo se kan duh takzet,” an ti.

MZP hruaitute chuan he hnalak chungchangah hian April 27, 2026 khan MPSC chuan written result a tichhuak tih sawiin, “Post 4 (pali) lak tur a nih laiin written result chhuakah mi pathum chauh tih tlin an ni. He hna diltu zingah MPSC-in October 24, 2025-a valid list a tihchhuahah mi 101 an awm. Chung zinga mi 74 te chuan written exam hi an hmachhawn a ni. April 7, 2026-a written result chhuakah mi 3 chauh an tling chu mak tiin MPSC lam zawhfiah an ni,” tiin written exam hmachhawn zinga mi 71 ten written exam an paltlang loh chhan chu MPSC online form/portal-ah veterinary council registration an upload loh vang niin MPSC lam chuan an hrilh tih an sawi.

He hnalak chungchangah hian free and fair a awm ngei theih nan zirchiangin hma an la tih sawiin MZP hruaitute chuan, “MPSC-in valid list a tih chhuah thlap tawh leh written exam hmachhawn thlap tawh mi 74 zinga 71 te reject/disqualified an ni leh hi hriatthiam har kan ti. Thil dik lo leh fel lo a awm ngei niin kan ngai. Kan zirchiannaah mi 71 reject/disqualified-te hnen atangin MPSC form, online portal an fillup lai hian veterinary council registration certificate upload na tur option/slot a awm lo tih leh online form-ah hian Others tih option pawh an fillup hunlai (i.e 11/09/2025-10/10/2025, 5:00pm) hian a awm lo tih hriat a ni,” a ti.

MZP hruaitute chuan MPSC website lamah technical problem a awm theih avang leh valid list tihchhuah tawh candidate zinga written exam hmachhawn mi 71 ten hetiang harsatna an tawk hi MPSC lam management fel tawk loh vangah an ngaih thu sawiin, “Innocent candidate-te tawrhtir lo turin MPSC thuneitute kan ngen a ni,” tiin MPSC thuneitute chu an thil tih dik tawk loah mawh phurhna la ngam tur leh he recruitment process zawng zawng pawh hi May 29, 2026 hma ngeia a bul atanga tan that a nih theih nana hma la turin MPSC thuneitute an phut tlat thu an sawi.

Tun hnaiah MPSC hian hnalak an kalpui tawh leh hnalak an kalpui mekah an tal buai nasain, tihsual an ngah em em tih sawiin MZP hruaitute chuan, “Sawrkar thuneitute hnenah MPSC thuam chak tura vawi eng emaw zat alo thlen tawh chung pawha vawiin ni thlenga MPSC-in full commission an la nei thei lo mak kan tiin, hriatthiam har kan ti hle,” tiin MPSC-in harsatna an tawh hi a rang thei ang bera chingfel turin Mizoram Sawrkar thuneitute an ngen.