Jun 23, 2026
Tuesday
MPYCC chuan vawiin (23.6.2026) hian an vice president Lalsanglura Sailo hoin Ramrikawn to Sakawrtuichhun NH-54 kawng hnathawh tha lo leh lungrem duhdah lutuk avanga chim an tlawh tih tarlangin, “He kawng siamtu Pu Vanchunglura, ZPM PAC member leh Chief Minister Pu Lalduhoma duhsak em em hnathawh danah sorkarin action na taka la tura ngenin kan ngen a, action a lak mai loh chuan he hnathawh chhe lutuk avanga harsatna thleng hi kan umzui zel dawn,” an ti.
Lalsanglura Sailo chuan ZPM Party chuan an campaign laiin tul bik thil teah lo chuan restricted tender pawh an tih ve loh tur thu an sawi tih sawiin, “Mah se, sorkar hmasa hun laia sanction an tih felsa vek tawh, election puan a nih tak avanga tender erawh an tih fel hman loh, Ramrikawn to NH-54 via Sakawrtuichhun kawng chu restricted tender-in hna an pe hman tep,” tiin engkim tih fel tawh a ni a, work order erawh an la pek chhuah hman loh thu a sawi.
Restricted tender reng reng chu Chief Minister phalna la hmasa lo chuan chhuah phal loh a nih thu office memorundun chhuah nimah se, he mi hnu lawk hian dik lo taka restricted tender Ramrikawn to NH-54 via Sakawrtuichhun kawng hnathawh tur chu chhuah a ni zui tho tih sawiin MPYCC VP chuan, “Mah se, party mualphona a thlen dawn avangin work order issue hmain cancel leh a ni. CM pawhin Assembly Session ni 9.3.2024 ah khan cancel a nih thu sawi chhuakin, open tender-a chhuah tur a nih thu pawh a sawi nghe nghe,” a ti.
MPYCC Vice President sawi danin, hetiang a nih lai hian General Financial Rules leh PWD Manual bawhchhiain, restricted tender hmanga thawh tir an tum chu Departmental Work-in Chief Minister duhsak Vanchunglura, ZPM PAC member nilai chu a thawh tir leh si a ni. Helai kawng siam nan hian cheng nuai 400 chuang dah a ni. Departmental work-a inthawh tir chi pawh nia lang lo hna lian chu ZPM Sorkara departmental work-a hna inthawh tirna lian ber record nimah se,Vanchunglura hian a hnathawh a hun taka a zo leh thei si loh avang leh hna a thawh chhiat luat avangin hasratna tam tak a thleng zui a ni.
Helai kawngpui siam leh kawngpui siamna atana lungrem reng reng a tha lo hle. Sawiselna a tam em em a; tui pek ṭhat a ni lo va, a hun takah zawh a ni lo bawk. Chuti chungin quality test result pawh a chhe em em. Hei hi ni 23.6.2026 (Thawhtanni) ZPM chhung inkhawmah chiang takin Bialtu MLA leh Adviser to Chief Minister (Finance) TBC Lalvenchhunga’n a ruh langin ZPM chhung inkhawmah sawi chhuak hialin ZPM party chu keh chhe mai thei dinhmuna a din chian zia a nemnghet a ni.
He kawng siam chhe lutuk avanga harsatna thlengah hian sorkarin mawh a phur a, kawng siamna hmanraw hman a chhiat bâkah cement proportion pawh a dik lo nasa hle. He kawng saim hnathawh a chhiat êm êm chhan chu hna inpek dan dik lo, induhsakna uchuak vang leh an in zawrh anga contractor ni miah lo ZPM nihna avanga hna thawh vang a ni. Dan lova hna an inpek avang hian GST pawh sorkarin a chàn vek. PWD-in he kawng siam tura ruahmanna leh hnathawh dan tur an siam point pariatah he kawng siam hi pakhatah mah a tling lo fai vek.
