Hmachhawp tha tak kan nei &#8211; Lalnunmawia Chuaungo

MPCC chuan vawiin (11.9.2026) hian an office-ah political session an nei a, thusawitu MPCC Sr. Vice President Lalnunmawia Chuaungo chuan Congress Party-in kan ram leh mipuite that tlan nan hmachhawp tha tak tak an neih thu leh health care (MUHCS) kalpui dik loh avangin Mizoram mipute sum chhiar sen loh vairamah a luan ral thu a sawi.

Lalnunmawia Chuaungo chuan health care (MUHCS) kalpui dik loh avangin Mizoram mipute sum chhiar sen loh vairamah a luang ral nia sawiin, “Hei hi Mizoram chhunga sum lengvak tlem chhante zinga pakhat a ni. Kan sorkar hrawn mek hi kan state ei leh bar (economy) chungchanga ruahmanna siam thiam lo, a ngaihna hre lo a ni tih a lang mek zel. India rama state tin ten anmahni state chhunga thil siam leh thawh chhuah tana duhsak bikna (preferential procurement policy) an neih kalh/ opposite chiahin an ti. Chu chuan kan state chhunga hna thar siam te, state chhunga sum vir vel ti tam tur nasa takin a pawt chhia. Kan thalaite hna thar siam kawngah te, kan State chhunga sum leng vel tihpun kawngah a ni lo zawngin nghawng a nei ta a ni,” a ti.

Congress Sorkar lai kum 2017-18 khan Mizoram Budget chu cheng vbc. 8803.10 a nih thu sawiin MPCC Sr. Vice President chuan, “Kum 9 a ral meuh chuan kum 2026-27 a kan state budget chu cheng vbc. 17469.91 niin kum 2017-18 budget let hnih aia tam a ni. Hetiang ni chung si hian Aizawla dawrkaite chuan an thil zawrhte hralh harsa an ti a, sum lengvak tlem vang ni a hriain an phun sup sup si a ni. Tuna kan mamawh chu thalaiten an hna hmuh, an thawh theih awm tawk thawh tur an nei lote hi kan buaina a ni,” tiin Pathian leh mipuite zarah Congress Party-in ram rorelna fawng a vawn leh hunah chuan economic policy tha zawk leh mipui nawlpuiin an hlawkpui tur ruahmanna tha an kalpui dawn thu a sawi.