News

Vawiin (25.8.2026) Assembly Session-ah Home Minister K Sapdanga putluh halpuah leh halmawi khapna tur ‘The Mizoram Regulation of Fireworks Bill, 2026’ chu sawiho a nih hnuah tlem tidanglama pawm a ni. Home Minister thusawi atang a lan danin, he khapna dan lo awm turah hian jail in tantir lam aiin, pawisa in chawitira inhrem uar a ni zawk dawn.

Home Minister chuan halpuah leh halmawi chu mihring hriselna leh environment ti chhetu a nih thu sawiin, “Mizoram Sorkar pawhin hunpui lai, a bik takin Krismas leh kumthar vuakvetahte kum 2008 atangin a lo khap tawh. Tlawmngai pawl hrang hrangte pawhin khap an duh. Halpuah leh halmawi khapna dan mumal tak state sorkarin a neih loh avangin CRPC leh BNSS hnuaiah district magistrate-ten khapna thupek an chhuah thin a, dan kengkawh kawngah leh thil tisualtu hremnaah duhkhawp lohna a awm thin,” a ti.

Sorkar leh tlawmngai pawl hrang hrang thukhawm chuan halpuah leh halmawi khapna dan mumal tak neih an duh tih sawiin K Sapdanga chuan, “Hemi bawhzui hian Home Secretary kaihhruaiin, halpuah leh halmawi khuahkhirhna dan mumal tak a awm theihna atan a hmaal turin Working Committee on Prohibition of Firecracker din a ni a, vawi tam tak thukhawmin an ngaihtuah. A draft chu uluk taka enho a nih hnuah tha tih tlan a ni,” tiin Council of Minister pawmpuina angin Assembly House-ah chhawp chhuah a nih tak thu a sawi.

Home Minister chuan a bill putluh chu mipuite hriselna tur atan te, boruak thianghlim kan neih theihna atan te, pheikhai rual taka khapna kenkawh a nih theihna atan te, Supreme Court leh National Green Tribunal thupek awmze nei taka bawhzuina atante duan a nih thu sawiin, “Thubuai siam dan tur leh hremna dan mumal tak neia duan a ni. Dan bawhchhiate pawisa chawitir dan leh lung in tan thlenga hrem theihnate pawh mumal taka duan a ni. Dan bawhchhiate jail-a khung ai maha, a hmuna chinfela, lu tihai tham hremna awm se kan duh. National leh international level thleng inchawitir lama in hremah an kal nasa tawh hle,” a ti.