FCS&CA Minister kaihhruaiin sawiho

Vawiin (14.9.2026) chhun khan Food Civil Supply & Consumer Affairs (FCS&CA) Minister hoin a pisaah Mizoram thlenga natural gas kalna tur pipeline phum chungchanga hmalakna leh harsatna awmte sawiho a ni.

B. Lalchhanzova chuan khawvel boruak ralmuang lo leh gas kan chawk luhna ramte an indo avangin ei rawngbawlna gas-ah kan phang tih sawiin, “Gas Pipeline atanga natural gas hmang state-te erawh chuan harsatna an tawk lo. Mizoramah pawh March 2027-ah chuan hei hi hmang ve hman tura hmalak a ni,” a ti.

Tuidam leh Darlak inkar kms. 1.5 tuna hna an thawh mek chu pipeline phumna turah harsatna an tawh thu IGGL hotuten an sawi. Minister hian October thla chhunga IGGL, FCS&CA Department, PWD leh Mamit DC-te nen a hmunah ama hoa en ni se, tiin department hotute chu ruahmanna siam turin a chah nghal.

FCS&CA Minister chuan Mizoram Sawrkarin IGGL gas pipeline chu a hunah tha taka zawh a nih theih nan theihtawp a chhuah pui zel dawn tih sawiin, “FCS&CA bakah Commerce and Industries Dept.-te pawh an inhawng. IGGL leh Tripura Natural Gas Company Limited lam te ram mamawh pawh land acquisition a rang thei anga an tih fel sak zel thin a ni a, hmalakna dangte pawh kan umzui sak zel dawn,” a ti.

FCS&CA Secretary Ravi Dadhich chuan contractor-ten chak zawka hna an thawh theih nan IGGL hotute hnenah Mizoram a hnathawh chu thil awlsam tak a ni lo tih chu hna tan hmaa an hriat sa a nih avangin, hei hi hnathawh muan nan chhuanlam a tling lo, a ti a, India Sawrkar project pawimawh, hunbi nei a nih angin tan mar a tul thu a sawi.

Meeting-ah hian PWD atangin CE (Highways) Robin Lalrinawma leh Aizawl D.C. aiawhte bakah video conferencing-in Mamit DC leh IGGL hotuten an rawn zawm.