News

Nimin (10.9.2026) khan Education Minister Dr Vanlalthlana chuan Gandhinagar-a Vidya Samiksha Kendra (VSK)-a tlawh a, Gujarat sawrkara Education Department hotute nen an inkawm.

VSK hi Gujarat Sawrkarin zirna in, zirtirtu leh zirlaite vil nan leh tihhmasawnna atana a kalpui a ni a, India rama a hmasa ber niin hlawhtling taka kalpui a ni. State hrang hrangah hman ve mek niin Education Minister leh Samagra Shiksha official-ten Mizoram VSK tihchangtlun a nih theih nan a taka kalpui a nih dan an zir chiang.

Dr Vanlalthlana chuan thu sawiin, “Mizoramah pawh sawrkarin zirna leh technology thlung zawmin, theihtawpa hma an la. India rama VSK hmanga sulsutu Gujarat tih dan ṭha awmte chu Mizorama hman a nih ve theih ka beisei. Gujarat Sawrkarin zirna kawnga hmalakna ṭha a neihte pawh Mizoram mila her rem theih a ni,” a ti.

Gujarat Education Department hotute pawhin Mizoram tih dan ṭhate chu entawn an tum thu an tarlang.

Nimin vek khan Higher & Technical Education Minister ni bawk Dr Vanlalthlana chuan New Age Makers’ Institute of Technology (NAMTECH), Gandhinagar a tlawh a, NAMTECH hotute nen inkawmin, hun rei lo tea class kalpui ṭan mai tur Mizoram Engineering College (MEC) chuan tun lai mil zirna a kalpui theih nan leh, MEC aṭanga zir chhuakten industry mamawh thiamna an zir chhuah nghal theih nan NAMTECH chu thawhpui turin a sawm.

NAMTECH hotute chuan State Minister-in a tlawh chu lawmawm an tih thu sawiin, an theihna zawna Mizoram sawrkar nen thawk ho tura an inhawn reng thu an hrilh.