News

Nimin (29.5.2026) khan Govt Model Comprehensive School, Model Veng, Aizawlah Education Minister Dr Vanlalthlana’n New Age Technology Skill Lab a hawng.

Education Minister chuan skill lab hawnna inkhawmah thu sawiin, “Bharat Forge-te nen thawkhova New Age Technologies zirna skill lab din a ni hi lawmawm hle. Zirlaiten an țangkaipui ngei ka beisei. Skill Lab hawn tak hian zirlaite zir dan phung a thlak danglam dawn. Education hi tun hma chuan ziak, chhiar leh vawn a ni mai a, tunah erawh chuan khawvel a inthlak danglam nasa tawh a, engnge kan siam theih tih leh kan chinfel theih tih hi a ni tawh zawk. Robotics sang tak tak te, drone te, 3D printing te simusoft atanga kan hmuh theih bungrua hrang hrangte hi a tha hlawm hle a, zirlaiten an thil hriat leh thiam te chu hmuh theiha an chantir theih ka beisei,” tiin Bharat Forge-ten zirtirtute training pe a, zirlaibu an pe bawk avanga a lawmthu a sawi.

Mizoram Sorkar leh Bharat Forge-te chuan thawk dunin, CSR kaltlangin he technologies lab hi an din a ni. Bharat Forge hnuai atang hian Simusoft Technologies te chuan skill lab din hna an thawk a, software hmanga robot khawl chi hrang hrang hnathawk thei tura design dan zirna a ni. Industry lian tak taka khawl hmanga hna an thawh dan te, mamawh dan a zira khawl siam dan turte he skill lab atang hian an zir dawn.