Delhi-ah press conference ko

Aizawl International Half Marathon chu kum 2026-ah lian zawk leh ropui zawka neih tum a nih thu Sports & Youth Services leh Tourism Minister Lalnghinglova Hmar chuan vawiin (16.10.2025) khan Vasant Vihar, New Delhi-a Mizoram House-a press conference-ah a sawi.

Lalnghinglova Hmar chuan, February 14, 2026-ah Aizawl International Half Marathon neih tum a nih dan sawiin, ‘Kumina kan neihah mi 1500 an tel a, beisei phak bâk a ni a, kum tharah erawh mi 5000 tal an tlan theih ka beisei,’ tiin, Delhi-a press mite kal tlangin India ram mipui zawng zawng half marathon-a tela, Mizoram tlawh pah turin a sawm.

Mizoram a awm tih pawh hre lote hnenah Mizoram tihlar an duh tih sawiin Tourism Minister chuan, ‘Tunah chuan Aizawl khawpui hi rela awlsam taka tlawh theih a nih tawh avangin state pawn mi ṭhahnem zawk kan beisei a, chu chu New Delhi-a media hmaah hian kan puang duh a ni,” tiin intihsiaknaa tel turte bakah Mizoram tlawh paha he huna tel turin mipuite a sawm a; lawmman belhkhawm hi cheng nuai 20 aia a tlem loh tur thu a sawi.

Lalnghinglova Hmar chuan Mizoram chu khualzin tlawh chakawm tak state a ni chungin kan inpho chhuah thiam loh vang te, inkalpawhna a harsat avang leh thlawhtheihna chuan man a to avangin tlawhtu an ṭhahnem tawk thei lo tih sawiin, “Tunah chuan rel kan nei a, Delhi, Kolkata leh Guwahati atangin awlsam taka kal zung zung a theih a ni,” tiin India state danga mipuite zin turin a sawm.

Aizawl International Half Marathon-a Mizoram sorkar thawhpui Innovations India hotupa Captain Rahul Bali chuan mipui tam zawk an beisei bakah lawmman sang zawk pek a nih tur thu a sawi a; India ram pawn atanga runner tel tum an awm tawh thu leh, India khawpui hrang hrang atanga tlan tur an pun a beisei thu a sawi.

Sports & Youth Affairs Department Director H Lalhmingthanga pawhin thu sawiin, ‘Intlansiak hlawhtling zawk kan buatsaih theih ngei ka beisei. Tun tumah hian intihsiakna hrang hrang – naupang, puitling mipa leh hmeichhia bakah senior/veteran thlengin intlansiak buatsaih a ni dâwn a; Ministry of Youth Affairs and Sports, Athletics Federation of India leh Mizoram Athletic Association-te hriatpui inelna a ni ang,’ a ti.