CYMA leh MKHC hruaitute an inkawm

Tukin (2.6.2026) khan ruihhlo do chungchangah Central YMA OB te leh Mizoram Kohhran Hruaitute Committee (MKHC) hruaitute CYMA Office-ah an inkawm.

Inkawmhonaah hian YMA-in ‘Ruihhlo Do’ kum a puan mekah kohhran nena tanlakho dan tur sawiho a ni. Kohhran hrang hrangten ruihhlo leh a kaihhnawih do kawngah theihtawp chhuahin hma an la mek hlawm a, ruihhlo in kan thalaite nun leh chhungkua a khawih nasat avangin tuna hma lakna theuh bakah uar leh zuala hmalak a tul thu sawiho a ni.

Hemi pual hian Kohhran tinah thupui pakhat hmanga tawngtairual buatsaih turin Central YMA hruaitute hian an ngen.

Kohhran tinten lehkha pawimawh leh baptisma certificate an pek chhuah thinah fimkhur zawka kal pui a tul thu sawiho a ni a, a bikin khua leh tui ni lote hnenah pek fimkhur turin Central YMA hruaitute hian MKHC hruaitute hi an ngen a ni.

Nikuma YMA Inkhawmpui Lianin a rel angin, ‘Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA-in hma la rawh se’ tih chungchangah Central YMA hruaitute chuan kohhran tinte hnenah chibil zawnga hma la lo tura ngenna a lo siam tawh angin chibil hmalakna a reh theihna tura theihtawp chhuah pui turin an ngen bawk.

Inkawmnaah hian MKHC atangin Chairman, Rev John Raldosanga, Synod Moderator leh Office Bearer dang mi 6 an tel a, Central YMA atangin President leh a thawhpuite an tel.