CM thusawiah huattur a awm kan hre lo &#8211; ZPM Thalai

ZPM Thalai chuan thuchhuah siamin, Mizoram Pradesh Youth Congress Committee (MPYCC) in kan Chief Minister Lalduhoma poster duk dak lo taka an cheibawl an duh lo hle tih tarlangin, “Memorandum of Settlement 1986 chungchanga kan Chief Minister-in Pu Laldenga ṭanhmun chungchang a sawinaah MNF tan huat tur a awmin kan hre lo bawk a ni,” an ti.

July 1, 2026 (Friday) a Chief Minister Lalduhoma’n Mizoram Law College Freshers Social & Felicitation Programme a hmanpuinaah Inner Line Permit leh Memorandum of Settlement 1986 chungchangah opposition party-te ang lo takin zep nei lo leh tlang takin thu a sawi tih tarlangin ZPM Thalai chuan, “ILP chungchanga Mizoramin a tih theih chin leh a dinngheh theih chinte tlang takin a sawi. ILP chu hmansual theih a nih thu leh hmansual a nihin Mizoram Sawrkar chu court a khin a niha a chak loh chuan chuan ILP hi paihsak theih kan ni tiin a sawi. Adaptation of Laws Order 1950 hmanga kan chhawm Inner Line Regulation hi Mizoram tana inhumhimna a nih rualin, hman sual theihna laka inveng tura Law zirlaite a fuihna thuah hian dawihzepna kan hmu ve lo,” tiin ṭhangtharten thil nihna diktak leh ṭan lak kan ngaihna lai dik taka kawhhmuh tu Chief Minister an rintawk thu an tarlang.

ZPM Thalai Politics ze hlui hi sim thei lovin nimin (August 4, 2026) khan Congress Party chuan kan Chief Minister chu thudik a sawi avangin poster hnaisai lo tak an siam sak tih tarlangin, “Mipui hmuh theih turin khawlaiah an tar chhuak hial a ni. Hetianga inbeihna tenawm tak, Christian-te tih atana mawi lo khawp laka Congress Party-te an inveng zo ṭhin lo hian ram hruai tlak an nih loh zia a ti lang chiangin kan hria a, sim tawh turin kan chah duh.
Hetih rual hian MNF Party pawhin thuchhuah siamin kan Chief Minsiter beih let nan total band an sawi ri leh ta a, an nihna diktak hailan a nih apianga total bandh hmanga inhliahkhuh an chin ṭhin hi simin, thil nihna diktak hmachhawn ngam zawk turin MNF Party hi kan chah duh a, Mizoram mipuite pawhin MNF thiltum hi lo zawmsak lo turin kan ngen bawk che u a ni,” an ti.