CM-in changel kawr sawngbawlna a hawng

Chief Minister Lalduhoma chuan vawiin (15.10.2025) chhun khan bial Serchhipah Ministry of DoNER PM-DevINE sum hmanga North East Centre for Technology Application and Reach (NECTAR) ten an din Changel Kawr Sawngbawlna Common Facility Centre, (NECTAR Livelihood Improvement Project – A Value Chain on Utilization of Banana Pseudostem for Value-Added Products ) Zuangleng rama din chu a hawng.

A hawnna inkhawm Serchhip DC Conference Hall-a buatsaih a nih zawhah Zuangleng rama a hmun Chief Minister hian a tlawhzui a ni. Lalduhoma chuan Zuangleng ram leh a chhehvelah hian changel a tam tih sawiin, ‘Khumtung leh a chhehvel khuaah Balhla chingtu tam tak an awm bawk Hengte behchhan deuh hian NECTAR lamten changel kawr sawngbawlna an han din a ni. He laia ram nei, changel leh balhla kawr, paih mai mai thinten an hnawm kha sumah an chantir thei dawn ta,’ a ti.

CFC hi changel kawr atanga hrui siamna, kuta siam paper siamna, vermicompost siamna leh savun thlakna vegan leather an tih mai siam chhuah theihna tura duan ni A buaipuitu NECTAR hi Department of Science & Technology hnuaia Autonomous Institution an ni. Zuangleng CFC enkawl tur hian APRINS, Guwahati-te chu thlan an ni. NECTAR hian India hmarchhakah technology thar leh tunlai zawk hmanga thingtlang loneitute tanpuina hna an thawk nual a, Mizoramah pawh hmalakna tam tham tak an nei a ni.