Cess lak titawp turin ngen

Mizoram Pradesh Congress Committee (MPCC) chuan vawiin (17.6.2026) chhun khan Chief Minister Lalduhoma hnenah petrol leh disel-a cess lak titawp tura ngenna ziakin an thlen.

MPCC thu thlen :

To,

The Hon’ble Chief Minister
Mizoram

Subject: Petrol leh Diesel a cess lak ti tawp tura ngenna.

Ka Pu,

Mizoram Pradesh Congress Committee hmingin chibai ka buk a che.

Khawvel hmun hrang hrangah oil man a pun chhoh zel avangin India ram leh Mizoram ah pawh namen loin petrol leh diesel man a lo pung chho ta. Kan hriat theih chinah Mizoram ah bik petrol leh diesel man a san ber tum a ni hial awm e. Heti taka POL man a lo pun chhoh tak avang hian mipuite leh lirthei a eizawng tam takin harsatna an tawk chho mek.

Hetiang taka POL man a pun chhoh tak avanga mipuiin harsatna lian zawk kan tawh zel loh nan Mizoram sorkarin September 2024 atanga petrol leh diesel atanga Social Infrastructure & Services Cess Rs. 2 per litre leh Road Maintenance cess Rs.2 per litre, a vaiin litre khat a cess Rs.4 zel a lak mek hi mipui phurrit chhawk zangkhai nana titawp rih turin Mizoram sorkar kan ngen a ni.

Mizoram sorkar hian VAT atangin petrol leh diesel ah chhiah tam tawk tak a lak sa reng tho avangin POL man tipung lehzual tura litre khat zela Mizoram sorkarin cess Rs.4 a lak belh mek hi mipuite zangkhai zawk nana sut turin MPCC chuan Mizoram sorkar kan ngen a ni.

Mizoram sorkarin Petrol leh Diesel atanga litre khat zela cess Rs.4 a lak mek hi June thla, 2026 ral hma ngei a sut turin Mizoram sorkar kan ngen a. Kan hun tiam chhunga POL atanga cess lak hi tihtawp a nih loh chuan Mizoram Pradesh Congress Committee chuan mipuite thlavang hauh turin hma a lak chhunzawm zel dawn a ni.

I rintlak,
( LALHMACHHUANA)
Secretary
MPCC Action Committee