News

MPCC Sr. Vice President Lalnunmawia Chuaungo chuan vawiin (25.6.2026) hian Aizawl Press Club-ah press conference neiin, BJP-in India rama kum 1.2 chhung rorelna an chan chhung hian mipui tana pawi tak thil thleng eng emaw zat a awm tawh tih sawiin, “Chung zinga zirlaite leh thalai hna zawng mekte tibeidawng em emtu chu BJP rorelna hnuaia exam chi hrang hrang zawhna putru (exam paper leak) hi a ni,” a ti.

May 3, 2026-a National Eligibility cum Entrance Test (NEET) kha zirlai nuai 22 chuangin an exam tih sawiin MPCC Sr. VP chuan, “India rama medical seat nuai 1.29 awmah doctor zir ve ngei tumin theihtawp an chhuah a ni. Mah se, zawhna putru avangin June 21 khan exam that tir leh an ni. NEET paper putru avang hian zirlai 12 an intihhlum phah a ni. NEET paper hi exam hmain WhatsApp-ah Rs.5000 – Rs.30,000 tein lei tur a awm a; Rajasthan-ah phei chuan nuai 30 thienga hralh a ni. BJP rorel kum 12 chhung hian ram pum huap exam (national level exam) ah tum 23 zet zawhna putru a awm tawh. BJP sorkar hnuaia thil thleng hi a rapthlak takzet,” tiin thalaite hma hun nasa taka tihchhiatin a awm thu a sawi.

Lalnunmawia Chuaungo chuan National Testing Agency (NTA) hi May 15, 2018 khan exam eng emaw zat (NEET, JEE, NCET, CUET- UG & PG, UGC-NET, CMAT etc) buaipui tura BJP sorkarin a din a nih thu sawiin, “Exam pakhatah zirlai nuai chuang an exam ziah. Zawhna putru (paper leak) a awm chuan zirlai nuai chuangin an tuar ziah tihna a ni. Kum 2024 June 18 a NTA hnuaia UGC-NET, zirlai nuai 9 chuangin India ram khawpui hrang hrang 317-a an exam chu a tuk, June 19 ah cancel a lo ni tawh,” ti.

MPCC Sr. VP chuan BJP Sorkarin National Education Policy, 2020 a kalpui dan pawh hi tih tak takna a awm lo tih sawiin, “Congress kaihhruai, UPA sorkar khan education-ah budget pumpui atanga 4.7% zet sum a dah laiin, BJP hian 2.4% chauh a dah. Thil man sang zel leh pawisa hlutna tlakhniam dan ațang chuan India ram zirna kalpui tak tak tur chuan budget pumpui atanga 2.4% ini a beitham mah mah a, he tih lai hian bawng zun (cow urine) zirchianna atan cheng vbc. 98 zet an seng thung,” tiin hei hian BJP in zirna a ngaih thutak (serious) loh zia a lan tir chian thu a sawi.

Lalnunmawia Chuaungo sawi danin, BJP-in India ram zirna siamthat a tum tak tak loh avangin thalai lehkhathiam zingah hna nei lo an tam em em a ni. Mithiamte chhut dan chuan, graduate 1000 ah mi 12 in hna nghet (permanent salaried job) an nei a, mi 297 in hna thawh tur an hmu lo a, mi 691 in hna nghet lo (informal job) an thawk a ni. Kum 2014 Lok Sabha inthlan campaign lai khan Narendra Modi hian India thalaite tan kum tin hna thar vbc. 2 zel siam a intiam a ni. Hei hi mumang maiah a chang zo ta; kum 2024 khan Haryana a hmunphiat hna (sanitation job) chu graduate leh post-graduate 46,000 chuang zetin an dil ve a ni.

Congress Party chuan BJP Sorkar hnuaia zirna kalphung nunrawng tak hi tih bo an tum. India ram thalaite tan zirna kawnga mawhphurhna la ngam sorkar din an tum a ni. Zirlaite leh mithiamte nena inrawn tlang zelin thangtharte tan zirna awmze nei leh kalphung tha zawk siam kan tum dawn. Hei hi tihhlawhtlin a nih theih nan India ram pum huap exam hrang hranga zawhna putru a mawhphurhna la ngam lo, zirlai nuai tel hma hun tichhetu Union Education Minister Dharmendra Pradhan hi Education Minister ațanga bang turin an phut a ni.