News

Tourism Minister Lalnghinglova Hmar hoin vawiin (16.9.2026) chhun khan a pisaah Anthurium Festival neih tur chungchang an thlirho. October 1 atanga October 3, 2026 chhunga neih tur he Anthurium Festival hi Reiekah leh Ailawngah nghah a ni dawn

Lalnghinglova Hmar chuan he festival hi Tourism leh Horticulture Department bultuma neih tur ni mah se, Mizoram Sawrkar buatsaih a nih angin sawrkar department zawng zawngte leh Mizoram mipuite kan tel vek tih sawiin, “Mizoramah tourism a ṭhang nasa a, khualzin an pung a, sum leh pai chevel a pung a; a hlawkna teltute chu dawrkai te, taxi driver te, thingpui dawr neitute, Mizo mipuite kan ni. He Anthurium Festival-ah pawh hian tualchhung mai bakah state pawn aṭangin tourist a tam thei ang ber an kal theih nan festival hlawhtling tak buatsaih turin ṭan kan lak a ngai a ni,” a ti.

Meeting-ah hian department hrang hrang te, YMA te, Reiek leh Ailawng khawtlang hruaitu te, Zo Anthurium Grower Society te, event management team te leh Mizo Indigenous Games hruaitute an tel. An tihtur leh mawhphurhna hrang hrang te, an thlen chhin te leh inbuatsaih dan te meeting-ah hian an report a ni.

Anthurium Festival-ah hian cultural programme bakah adventure lam hawi – trekking, cave exploration (Khuangchera Puk, Thawmpawnga Puk and Ngaitei Puk), silai inkahsiak leh a dangte a awm ang. Naupang infiamna hmun te, pangpar huan tlawh tur te, Mizo infiamna chi hrang hrang entir leh festival chhimtute tana tel ve theihna tur thil chi hrang hrang siam tum a ni. Mizo zaithiam lar te sawmin Leikapui Night leh a kharna concert ropui tak buatsaih pawh an tum.