Aizawl West-II Ruihlo Do Meeting

Vawiin (24.8.2026) chawhnu khan Excise and Narcotics Minister Lalnghinglova Hmar hoin a bial Aizawl West II Assembly Constituency Ruihhlo Do Meeting chu Cultural Centre cum Auditorium, Vaivakawnah neih a ni. Excise Minister chuan ruihhlo do turin kan la tlaichhiat loh thu a sawi.

Excise Minister chuan ruihhlo do hlawhtling tur chuan sawrkar tha chakna chauha innghah theih a nih loh avangin kohhran te, tlawmngai pawl te leh khawtlang hruaitute chu thawhpuiah a sawm nawn a, “Ruihhlo la tichhin loten an tihchhin loh nan nasa lehzuala inzirtirna kalpui a tul,” tiin ruihhlo che vel khuahkhirh tura sawrkar leh mipuite thawhhona a fak.

Thalaiten ruihhlo an khawih tanna chu pawi tham ni loa kan ngaihte a ni fo tih sawiin, nu leh pate, an chenpuite leh zirtirtute chu an naute ngaihven reng turin a chah a, “Ruihhlo ngawl vei mekte enkawlna kawngah pawh tan lak a tul. Ruihhlo do turin kan la tlai chhe lo a, kan zavaia theihtawp kan chhuah phawt chuan danglamna lian tak kan thlen thei a ni,” a ti.

Meeting Excise & Narcotics Commisioner Z Lalhmangaiha’n a kaihruai a, Aizawl West-II huam chhung corporator pahnih C Vanlalhruaii leh Vanlalhruaia bakah Aizawl West II huam chhunga Local Council te, NGO leh kohhran aiawhte an tel.

Excise Joint Commisioner Peter Zohmingthanga’n powerpoint presentation hmangin Mizorama ruihhlo dinhmun tlangpui a sawifiah a, zawhna leh chhanna hun leh sawihona hun an hmang nghal.