News

MJA-in an sawm angin Lok Sabha MP Richard Vanlalhmangaiha’n vawiin (15.9.2026) chhun khan Aizawl Press Club a tlawh a, MJA President Vanlalrema Vantawl hoin an inkawm a ni.

Richard Vanlalhmangaiha chuan, amah chu ZPM Party mi ni mah se, Mizoram mipuite MP a nih thu sawiin, “Thil thlen dan leh a hmun leh a hun a zirin a changin Kristian MP te, minority MP leh Northeast MP nih changte kan nei thin. Lok Sabha bikah MP zingah Kristian 22 kan awm. Ram chhung hmun hrang hranga Kristian-ten harsatna an tawh changin inhmukhawmin, a theih ang angin hma kan la thin a ni,” a ti.

MP-te chu State aiawh an nih angin Sorkar Laipui an dawrnaah hmelhriat leh thiantha neih a pawimawh tih sawiin Richard Vanlalhmangaiha chuan, “Kumtin MP Fund kan dawn bakah inthianthatna hmanga fund pawh chhuah tur tam tak a awm ve thin a, hemi kawngah hian theihtawp chhuah ka tum,” tiin Mizoram chanpual bakah Sorkar Laipui atanga sum tam thei ang ber pawt chhuak tura hmalak a tum thu a sawi.

Lok Sabha MP sawi danin, MP a nih hnuah a hmalakna zarah Mizoram Sorkarin Sorkar Laipuia project a theh luh tihhlawhtlin mai loh (Project Pending) Rs. vbch. 668.52 hu pek chhuah a ni tawh. Hei bakah hian PMGSY-I hnuaiah GST liability cheng vbc. 150 vel pek chhuah a ni. Hei phei hi chu project tihtawp tawh, a hmalakna avanga hawn thar leh a ni. National Highway 306 A, Vairengte – Vaitin inkar kawng siamna tur cheng vbc. 99.78 pawh tunhnaiah pek kan ni.

Richard Vanlalhmangaiha chuan, MP Fund hman kawngah dik leh daihzai thei ang bera kal a tum tih sawiin, “Tunah hian Mizorama khaw 94-a zirna in hrang hrangah MP Fund ka pe tawh. Hei bakah hian mipui tam thei ang berin MP Fund an chhawr theih nan hmalak zel ka tum,” tiin ram rawng a bawlnaah Mizoram mipuite chu thlawp zel turin a sawm a, a mah pawhin ram leh hnam tan theihtawp chhuah zel a tum thu a sawi.